Një ilaç i ri eksperimental mund të ndihmojë personat që përdorin injeksione për humbje peshe si Wegovy, Mounjaro dhe Ozempic të shmangin humbjen e masës muskulore, një efekt anësor që shpesh shoqërohet me këto barna.
Sipas një studimi të publikuar në revistën shkencore “Nature Medicine”, ilaçi i quajtur apitegromab ndihmoi përdoruesit e ilaçit Mounjaro të ruanin më shumë muskuj gjatë procesit të dobësimit, pa penguar humbjen e yndyrës, shkruan BBC.
Ekspertët thonë se deri në një të tretën e peshës së humbur nga përdoruesit e barnave GLP-1 mund të vijë nga masa muskulore dhe jo vetëm nga yndyra. Kjo mund të shkaktojë ndryshime të dukshme në formën e trupit, përfshirë humbjen e volumit në vithe dhe në pjesë të tjera të trupit.
Në studimin gjashtëmujor me 102 të rritur, kryesisht gra, personat që morën apitegromab ruajtën rreth 1.9 kilogramë më shumë masë muskulore krahasuar me grupin që mori placebo. Humbja e muskujve përbënte vetëm 14.6% të peshës së humbur në grupin që mori ilaçin e ri, kundrejt 30.2% në grupin tjetër.
Apitegromab vepron duke bllokuar një proteinë që kontribuon në shpërbërjen e muskujve. Aktualisht ai është ende në fazë testimi klinik dhe administrohet përmes infuzionit intravenoz, megjithëse kompania prodhuese po shqyrton mundësinë që në të ardhmen të përdoret si injeksion i zakonshëm.
Megjithatë, specialistët paralajmërojnë se nevojiten studime më të mëdha dhe afatgjata për të vërtetuar nëse ruajtja e masës muskulore përkthehet në përmirësim të forcës fizike, shëndetit dhe cilësisë së jetës.
Ndërkohë, mjekët rekomandojnë që përdoruesit e barnave për dobësim të kombinojnë trajtimin me ushtrime force dhe konsum të mjaftueshëm proteinash.
Aktivitete si ecja në terrene të pjerrëta, ngjitja e shkallëve, çiklizmi, joga, ushtrimet me pesha ose me rezistencë mund të ndihmojnë në ruajtjen dhe forcimin e muskujve gjatë humbjes së peshës. /Gazeta Shneta/