Çerdhe, gjyshe apo dado?

2017-03-29 në ora 07:50

Çfarë është më e mira për fëmijën: të rritet me gjyshen që e do, me dadon që është profesioniste apo në çerdhe duke bërë shoqëri me fëmijët e tjerë dhe duke mësuar nga edukatorët? Le të shikojmë faktorët që do të na ndihmojnë për të marrë vendimin e parë të rëndësishëm për rritjen e fëmijëve tanë.

Nëse zgjedhim një dado me përvojë si kujdestare për fëmijën

Avantazhet

Fëmija mbetet në vend dhe në ambient të mbrojtur të shtëpisë tonë.

Nuk ka nevojë të zgjojmë fëmijën herët në mëngjes për të shkuar në kopshët. Pra, dhe ai fle aq sa dëshiron dhe ne shmangim ankthin e mëngjesit.

Dado ndjek rreptësisht programin të cilin i japim. Fëmija del për shëtitje çdo ditë në të njëjtën orë, ha dhe fle pa vuajtje

Dado është (ose të paktën duhet të jetë) tërësisht e dedikuar në kujdesin e fëmijës. Mund ti lexoj, ti mësojë gjëra, të formojë dhe në përgjithësi ta motivojë në mënyrë krijuese.

Nuk merr viruset një pas një. Mbetet i mbrojtur nga sëmundjet dhe ne nuk është e nevojshme të humbim lejen e verës që në vjeshta.

Disavantazhet

Zgjedhja e duhur e dados për fëmijën është e vështirë dhe është vetëm e jona. Kjo kërkon kohë, hulumtime, instinkt të fort dhe është një proces që mund të krijojë stres.

Sado e mirë dhe ‘e kontrolluar’ të jetë dado, ajo është ende një fytyrë e re në shtëpinë tonë, në familjen tonë,që kalon kohë me fëmijën tonë, ndërsa ne jemi larg. Kjo mund të krijojë ankth, dyshime, xhelozi, dhe madje edhe faj.

Zgjedhja e dados kushton më shumë se dy zgjidhjet e tjera.

Fëmija kalon orë të gjata me dadon (sidomos kur koha nuk lejon shëtitjet), kështu që ai nuk ka stimujt që do të ndihmojnë zhvillimin, do të mërzitet,  do të ankohet, të dojë fëmijë të tjerë për shoqëri.

Ndryshe nga shkolla, ku të papriturat ballafaqohen nga ekipi i mësuesve, dado është vetëm një njeri që do të thotë se ne duhet të kemi të gatshme një zgjidhje emergjente në qoftë se dado sëmuret, nëse vonohet në trafik në mëngjes, në qoftë se ka nevojë për të munguar për disa arsye apo thjesht nëse ka vendosur për të ikur.

Këshilla për përshtatje më të mirë me dadon

Idealisht dado duhet të vijë në shtëpinë tuaj dhe jo të shkojë fëmija në shtëpinë e saj. Kjo siguron që ndryshimi për fëmijën të mos jetë kaq i fortë. Do të ndihet rehat pasi do të jetë në shtëpi, pranë lodrave të tij të dashura, kështu përshtatja me situatën e re pa prindërit, do të jetë më e lehtë.

Sigurohemi që fëmija njihet me personin e ri në jetën e tij sa më qetë të jetë e mundur. Nuk mund ta sjellim dadon paprtitmas në shtëpi dhe ta lemë fëmijën vetëm me të që ditën e parë. Fëmija ka nevojë për kohë dhe ne jemi të deyruar t’ia sigurojmë këtë. Në ditët e para ne rrimë së bashku me dadon dhe fëmijën në mënyrë që fëmija të ndihet i sigurtë me të dhe i spjegojmë fëmijës (pavarësisht sa i vogël është) që kjo zonja është këtu për tu kujdesur për të dhe të qëndrojë me të, ndërsa mami do të jetë në punë.

Nëse dado nuk flet gjuhën amtare

Që fëmija të vijë në kontakt me gjuhë tjetër përveç asaj të nënës është mirë. Ka dy raste që kjo mund të jetë e dëmshme për fëmijën:

Kur të dyja gjuhët përzihen dhe përdoren në një masë të madhe në shkëmbim të njëra- tjetrës psh kur e njëjta fjali ka fjalë në të dyja gjuhët.

Kur dado që kujdeset për fëmijën flet një gjuhë që ajo nuk e di mirë, pasi ajo nuk e mësoi atë që në fëmijëri. Psh greqisht apo Aglisht të çalë.

Nëse zgjedhim kopshtin/çerdhen

Avantazhet

Fëmija mëson vazhdimisht gjëra të reja, kalon kohë në mënyrë krijuese, kultivon aftësitë përmes lojërave, këngëve, vizatimeve, ndërtimeve etj.

Fëmija ndërvepron me fëmijë të tjerë dhe zhvillon aftësinë e të qenit social.

Mamaja i beson  më lehtë mjedisit të organizuar të çerdhes/ kopshtit, ku ka edhe fëmijë të tjerë, më shumë se sa një dadoje që nuk e njeh mirë apo dy njerëz të vjetër si gjyshi me gjyshen.

Në kontrast me mjedisin e butë të shtëpisë, çerdhja/ kopshti kanë rregulla dhe një program që fëmija duhet të ndjekë, rregulla të cilat duhet t’i respektojë.

Zgjidhja e çerdhes/ kopshtit ështe shumë ekonomike. Një kosto e përafërt për çerdhet/kopshtet shtetërore është rreth 3 mijë lekë në muaj.

 Disavantazhet

Nëse nuk dëshironi të paguani për autobuzin e shkollës e nëse zgjidhni të çoni e të merrni vetë fëmijën në kopësht apo çerdhe, ju duhet të jeni të përpiktë si në mëngjes dhe në mbasdite.

Veçanërisht gjatë vitit të parë në çerdhe/kopësht, ngaqë vjen në kontakt me shumë fëmijë, fëmija juaj do të marrë vazhdimisht infeksione të ndryshme, që do të thotë që duhet të përgatiteni: do të kalojë shumicën e kohës në shtëpi, kështu që duhet të keni një alternativë për kohën kur është i sëmurë.

Çerdhet/ kopshtet shtetërore mbyllen për një kohë të gjatë për pushime e  gjatë verës… dhe kur mund të ketë grevë. Kështu ju duhet një kujdestare alternative për fëmijën.

Këshilla

Preferohet që fëmija të ketë mësuar të ecë përpara se të shkojë në çerdhe. Koha e përshtatshme është kur fëmija ka bërë 18 muajsh, kur të ketë mësuar plotësisht të ecë… e të bëjë akrobaci.

Idealisht, në fillim fëmija duhet të kalojë disa orë në çerdhe dhe pastaj gradualisht të rritni orët e qëndrimit deri në orarin e plotë.

Nëse e lejon rregullorja, çerdhja mund të kombinohet me dadon ose gjyshen, të cilat mund ta marrin më herët në shtëpi.

Duhet të sigurojmë gjithmonë fëmijët duke u spjeguar  që do t’i dërgojmë në çerdhe. Për shembull, thoni: “Po të çoj në cerdhe dhe do të vij të të marr më vonë. Tek çerdhja do të takohesh me shokët, shoqet dhe edukatoret e tua.” Kjo duhet të përsëritet çdo ditë, ne duhet të bisedojmë me fëmijën dhe t’i tregojmë se çfarë do të ndodhë.

Mos e mikloni fëmijën, pasi do të ketë frikë që diçka e keqe do t’i ndodhë atij ose ne.

Nëse fëmija është nën 6 vjeç, kur të kthehet nga çerdhja, ju duhet t’i jepni kohë t’ju njohë sërish, për të kujtuar aromën dhe zërin tuaj. Vetëm kur të kthehet në shtëpi arrin një fëmijë i kësaj moshe të njohë sërish nënën. Kjo nuk ndodh as në çerdhe e as gjatë rrugës së kthimit në shtëpi. Kjo mund të duket surprizuese, por duhet të mbani mend që fëmija ka nevojë për hapësirën e tij, mjedisin familjar, zërin e mamit e të babit, krevatin e tij, lodrat dhe dhomën.

Nëse zgjedhim gjyshen

Avantazhet

Fëmija qëndron me gjyshen dhe jemi të sigurtë që është me dikë që e dashuron dhe ka dëshirë të kujdeset për të në mënyrën më të mirë.

Ky opsion është më ekonomiku!

Mund të ndihemi të sigurt. Gjyshja jo vetëm që do të kujdeset për fëmjën, por edhe do të gatuajë për të dhe do ta mbajë dhe me orë të gjata, nëse na duhet të rrimë më gjatë në zyrë ose të vendosim për të dalë për një kafe të shkurtër pas pune!

Disavantazhet

Gjyshërit kanë tendencë të llastojnë nipërit e mbesat. Për këtë arsye mund të ndodhë që fëmija që marrim gjatë kthimit në shtëpi të jetë… një fëmijë tjetër.

Gjyshet dhe shoqet e tyre e kanë të vështirë t’i thonë jo një fëmije që u lutet për karamele, patatina, të shikojë televizor apo të hajë patate të skuqura! Nëse nuk biem dakort me gjithë këto, ka shumë gjasa që të kemi kohë të vështira duke u përpjekur të sqarojmë gjyshen të përshtatet.

Gjyshet janë zakonisht të një moshe të thye,r që do të thotë që ato mund të mos jenë në gjendje të  plotësojnë nevojat e fëmijës (për shëtitje apo lojëra). Kjo mund të krijojë problem për fëmijën, i cili do të detyrohet të kalojë kohën brenda në shtëpi (me shumë mundësi me gjyshe të tjera, ose duke parë televizor), ose gjyshja mund ta llastojë duke u përpjekur të kënaqë nipin, mbesën.

Këshilla

Shpjegoji gjyshes që ka kufinj për dëshirat e fëmijës dhe që kjo është mirë për të gjithë – por më shumë për vetë fëmijën.

Jepi gjyshes një telefon celular që mund të përdorim të komunikojmë me të kurdo që të nevojitet.

Konkluzioni

Pavarësisht se cilin nga tre opsionet do të zgjidhni, është e rëndësishme për fëmijën të kuptojë që përveç mamit e babit, ka dhe njerëz të tjerë në mjedisin e tij me të cilët ai mund të ndihet i sigurt. Përtej rritjes natyrale, me kalimin e kohës, kontributi ynë është i rëndësishëm në kuptimin e saj. Kështu sigurohu që fëmija të takojë fëmijë të tjerë në parqe, kënde lojërash etj. Kur qysh në muajt e parë të jetës fëmija socializohet me njerëzit, miqtë dhe të afërmit, luan me ta, e mbajnë fëmijën, i

flasin e i këndojnë këngë et,j fëmija nis të ndihet më i afërt me ta e ndërsa rritet mund të pranojë më lehtë që të kalojë pak kohë me njerëz të tjerë përveç mamit e babit. Idealisht çdo herë që mund të shkoni për vizita, merreni fëmijën me vete në mënyrë që të njohë të gjithë xhaxhallarët, dajot, tezet, hallat, gjyshërit etj. Përmes këtij procesi të takimit të njerëzve të tjerë të dashur, fëmija gradualisht zhvillon një sens të të qenit të përgatitur si për takimin e fytyrave të reja apo për të qenurit larg nga vëmendja e vazhdueshme e mamit apo e babit.