Fondi i Sigurimeve Shëndetësore paguan mbi 13 mijë Euro qira mujore për shfrytëzimin e objektit për zyre.
Fondi i Sigurimeve Shëndetësore po vazhdon të shfrytëzojë një objekt me qira në qendër të Prishtinës për të cilin paguan qira mijëra euro në muaj, shkruan Gazeta Shneta.
FSSH ishte zhvendosur në këtë objekt në vitin 2018 dhe që atëherë paguan 13 mijë e 173 Euro në muaj qira për shfrytëzimin e kësaj hapësire.
“Qiraja mujore për shfrytëzimin e këtij objekti është 13.173,30 Euro. Kohëzgjatja e kontratës është për tre vite. Hapësira që ka në shfrytëzim institucioni ynë është 1 mijë e 495 metra katror”, thuhet në përgjigjen e FSSH-së për Gazetën Shneta.
Nga ky institucion kanë shtuar poashtu se kanë bërë kërkesë në Ministrinë e Punëve të Brendshme për t’u zhvendosur në ndonjë objekt publik por sipas FSSH-së kjo ministri nuk iu ka bërë ende zgjidhje.
Ndryshe Fondi i Sigurimeve Shëndetësore ka rreth 30 milionë Euro borxhe ndaj institucioneve private shëndetësore brenda dhe jashtë Kosovës të akumuluara në vitet e fundit përmes programit për trajtim jashtë institucioneve publike. /Gazeta Shneta/