Drejtoria për hetimin e krimeve ekonomike e Policisë së Kosovës sot ka zhvilluar me sukses një operacion në disa barnatore të Prishtinës. Pas këtij operacioni dy persona, pronarë të barnatoreve kanë përfunduar në pranga. Lokacioni ku është zhvilluar aksioni shtrihet në disa prej lagjeve të njohura të Prishtinës si Kodra e Trimave, Ulpiana, Bregu i Diellit e pjesa tjetër e njohur si “Xhamia e Llapit”, shkruan Insajderin.
Dy të arrestuarit siç mëson Insajderi janë Shkëlqim Isufi pronar i “Ivy Pharm” dhe Gzonit Salihaj pronar i “Salihaj Pharm”.
Insajderi ka mësuar se cak i aksionit të policisë kanë qenë dy njësitet e “Ivy Pharm”, në lagjen Kodra e Trimave e Breg të Diellit, “Salihaj Pharm” e barnatorja “Rexall” në Ulpianë si dhe “Duropharm” tek Xhamia e Llapit.
Të njëjtit dyshohet se kanë shitur produkte farmaceutike (barna), të cilat dyshohet se janë kontrabanduar dhe janë të rrezikshme për jetën e qytetarëve.
Siç bëhet me dije në njoftimin e policisë, gjithsej janë sekuestruar 598 lloje të produkteve.
Barnatoret sërish rrezikojnë jetën e qytetarëve me barna të kontrabanduara, arrestohen dy persona
Gjatë kontrollimit, Policia kishte kuptuar se barnat ilegale ishin vendosur në pjesë tjera të lokalit, sipas policisë në formë bunkeri.
“Sot, më 16.03.2023, hetuesit policorë në bashkëpunim me Inspektorët Farmaceutik të Ministrisë së Shëndetësisë kanë ndërmarrë veprime në teren ku janë kontrolluar shtatë (7) barnatore në kryeqytet. Gjatë kontrollimit në dy barnatore është zbuluar sasi e madhe e barnave pa banderola që dyshohet se janë kontrabanduar. Këto barna ishin të fshehura në pjesë shtesë të lokalit të rregulluar enkas për fshehjen e tyre (në formë të bunkerit)”, thuhet në njoftim përcjell Insajderi.
Tutje bëhet me dije se gjatë këtij operacioni pas zbulimit të kësaj sasie të barnave, është njoftuar edhe Dogana e Kosovës të cilët kanë dalë në teren dhe janë bashkangjitur ekipeve nga institucionet e përfshira në këtë operacion.
“Ekipet policore, inspektorët farmaceutik dhe ekipet nga dogana kanë bërë numërimin e llojit të produkteve të barnave nga ku ka rezultuar se janë sekuestruar 598 lloje të produkteve, kurse sasia e barnave brenda një produkti është më e madhe dhe ka mbetur të numërohen dhe evidentohen nga njësitet përkatëse”
Policia me aksion në disa barnatore në Prishtinë – zbulohen bunkerë me barna, arrestohen dy persona
Dy të arrestuarit janë dërguar në mbajtje për 48 orë.
“Në polici, janë shoqëruar dy persona të dyshuar, pronarë të barnatoreve, të cilët janë intervistuar në prezencën e avokatit të tyre mbrojtës, ndaj tyre janë iniciuar rastet: ’prodhimi dhe shpërndarja e produkteve të dëmshme mjekësore’, ‘kontrabandim i mallrave’ dhe “tregtia e ndaluar” dhe me aktvendim nga prokuroi të njëjtit dërgohen në mbajtje deri në 48 orë”.