Mbyllet “1 Tetori”, vaksinimi kundër Covid-it vazhdon në QMF 7 në Emshir

2021-12-20 në ora 15:08

Nga sot vaksinimi kundër Covid-19 do të zhvendoset nga salla 1 Tetori në Prishtinë në Qendrën e Mjekësisë Familjare 7 në Emshir.

Përveç vaksinimit kundër Covid-it, në QMF 7 do të bëhet edhe vaksinimi kundër gripit sezonal, ka njoftuar Ministria e Shëndetësisë, transmeton Gazeta Shneta.

Më poshtë mund të gjeni njoftimin e plotë:

Ministria e Shëndetësisë njofton qytetarët se pothuajse në të gjitha komunat ka përfunduar plani I zhvendosjes së qendrave të vaksinimit nga qendrat e mëhershme në hapësira (kryesisht) të Qendrave Kryesore të Mjekësisë Familjare, QMF, apo hapësira adekuate të cilat janë përcaktuar si më të përshtatshme për vijimin e vaksinimit nga komunat.

Sa i përket komunës së Prishtinës, siç është njoftuar edhe ditëve të kaluara, nga sot ekipet e vaksinimit që kanë vaksinuar në sallën “1 Tetori” do të vaksinojnë qytetarë në Qendrën e Mjekësisë Familjare nr. 7 në lagjen Kalabria në Prishtinë (ish-Emshir).

Me kalimin e ekipeve të vaksinimit për Prishtinën në këtë qendër, salla “1 Tetori” do t’i kthehet veprimtarisë së vet primare.

Prandaj, luten qytetarët e komunës së Prishtinës që si për vaksinimin kundër COVID-19, ashtu edhe për vaksinimin kundër Gripit sezonal, të shkojnë në QMF nr. 7 në lagjen Kalabria.

Në komunat e tjera, lokacionet e vaksinimit i gjeni të bashkëngjitura në linkun në vijim, ku lista e lokacioneve mund të pësojë ndryshime, me që disa komuna janë në zhvendosje e sipër të qendrave të vaksinimit në hapësirat e reja.