Në 10 vjetorin e themelimit të Odës së Mjekëve të Kosovës është çmuar lart roli dhe kontributi i mjekëve në vendin tonë.
Oda e Mjekëve të Kosovës ka organizuar sot një ceremoni ku ka shënuar 10 vjetorin e themelimit të kësaj organizate e cila ka rolin kryesor në organizimin dhe kompetencat e mjekëve në Kosovë, shkruan Gazeta Shneta.
Kryetari i OMK-së Pleurat Sejdiu ka thënë se parimi i mjekëve i cili ka mbetur i pandryshuar tash e 2 mijë vjet, vazhdon të respektohet në Kosovë dhe në mbarë botën.
“Që nga kohët e lashta njerëzit janë përpjekur që ta çlirojnë veten nga dhimbjet dhe sëmundja me parimin ‘Mos bëj dëm, kujdes dhe shëro’. Ky parim zbatohet edhe sot në mbarë botën nga mjekët tash e 2 mijë vjet. Forca shtytëse e mjekut është një lloj instinkti për të cilin asnjë përpjekje nuk është shumë e madhe”, ka deklaruar Sejdiu.
Në këtë ceremoni ka marr pjesë edhe ministri i Shëndetësisë Arben Vitia i cili ka thënë se roli i Odës në shëndetësinë e Kosovës është i jashtëzakonshëm.
“Oda ka një rol dhe kontribut të jashtëzakonshëm në shoqëri. Mjekët janë pjesë thelbësore e shoqërisë. Kontributi i tyre e tejkalon edhe rolin e tyre profesional sepse mjekët janë avantgarda e një shoqërie”, ka deklaruar Vitia.
Në këtë ceremoni kanë marr pjesë edhe përfaqësues të organizatave të mjekëve nga Evropa, përfaëqsues të institucioneve në Kosovë dhe anëtarë të OMK-së. /Gazeta Shneta/