Pacientit 82 vjeçar C.B. pas një operacioni mbi 5 orë i është hequr tumori në fytyrë nga kirurgët në Klinikën e Kirurgjisë Plastike dhe Rekonstruktive në QKUK.
Në njoftimin e SHSKUK-së thuhet se ky lloj operacioni bëhet për herë të parë, transmeton Gazeta Shneta.
“Në Klinikën e Kirurgjisë Plastike dhe Rekonstruktive të Qendrës Klinike Universitare të Kosovës është bërë për herë të parë një operacion specifik, ku pacientit C.B (82 vjeç) i është bërë heqja e tumorit me dimension 30 x 20 centimetra”, thuhet në njoftim.
Operacioni ka zgjatur mbi 5 orë, pacientit i është bërë largimi kirurgjik i masës se madhe tumorale në tërësi, në mënyrë radikale, ku për shkak të zbulimit të strukturave vitale anatomike te kokës dhe qafës është bërë mbulimi me muskulin e madh të gjoksit të anës së majtë të kombinuar me graft (transplant) të lirë lëkuror, nga vetë pacienti.
Është bërë rregullimi i këndit të majtë të gojës me shtrënguese të lirë të marrë nga dora e djathtë ( PL). Pacienti një natë ka qëndruar në mjekimin intensiv, mbikëqyrur nga stafi shëndetësor i mjekimit intensiv qendror.
Gjendja momentale e pacientit është e mirë dhe stabile, ai ndodhet në Klinikën e Kirurgjisë Plastike dhe pritet që gjatë ditëve në vijim të lëshohet për në shtëpi.
Ekipi mjekësor është udhëhequr nga Dr. Ylber Zenjullahu, dr. Shkelqim Dërguti, mbështetur nga ekipi i anestezionit me dr. Mentor Alimusa,dr. Ingerta Sahiti- Krasniqi dhe stafi i specializantëve dhe anestezisteve dhe instrumentareve. /Gazeta Shneta/