Qeveria e Kosovës dhe Federata e Sindikatave të Shëndetësisë, kanë arritur një marrëveshje për pagesat shtesë për punëtorët shëndetësorë.
Në një njoftim të Qeverisë bëhet e ditur se kryeministri Avdullah Hoti, ministri Armend Zemaj dhe FSSHK e përfaqësuar nga Blerim Syla, Blerim Delija dhe Xhemajl Selmani, janë pajtuar për pagesat shtesë për punëtorët shëndetësorë nga muaji shtator deri në dhjetor, shkruan Gazeta Shneta.
“U pajtuan për pagesat shtesë për të punësuarit në institucionet publike shëndetësore të Republikës së Kosovës, në sistemin primar, sekondar dhe terciar, deri në fund të vitit 2020, bazuar në ligjin AntiCovid”.
“Duke marr në konsideratë mundësitë financiare që Qeveria e Republikës së Kosovës ka në këtë periudhë, për të mbështetur të punësuarit në sistemin publik shëndetësorë, palët u morën vesh që pagesat shtesë për muajit shtator-dhjetor të jenë si në vijim: 1) Mjekët – 250 euro në muaj, 2) Infermierët – 150 euro në muaj, dhe 3) Stafi mbështetës – 100 euro në muaj”, thuhet në njoftimin e Qeverisë.
Sipas këtij njoftimi, Hoti është zotuar poashtu se Qeveria në afat shumë të shkurtër kohor do të kryej edhe pagesat shtesë për stafin mbështesë, për muajit korrik dhe gusht të këtij viti.
“Palët po ashtu janë dakorduar që në fillim të viti të ardhshëm, të diskutohen mundësitë për pagesat shtesë për kohën sa do të zgjasë pandemia me Covid 19, në territorin e Kosovës”, thuhet në njoftim. /Gazeta Shneta/