Rexhepi po trajtohet në Turqi por nuk bëhet e ditur gjendja shëndetësore e tij

2017-05-12 në ora 11:39

Bajram Rexhepi, i cili po trajtohet në një klinikë të specializuar në Turqi, është vizituar nga dy këshilltarë të Kadri Veseli, Blerim Latifi dhe Ilmi Ramadani.

Në takim me ekipin e mjekëve që po merret me trajtimin e ish kryeministrit Rexhepi dhe drejtorin e përgjithshëm të spitalit, këshilltari i Veselit, Blerim Latifi ka thënë se “Jemi këtu për të shprehur vëmendjen e përditshme dhe përkushtimin e plotë të kryetarit Veseli për t’i qëndruar pranë ish kryeministrit Rexhepi në këto momente të vështira për të dhe familjen”.

Në takim, ishte edhe Konsulli i përgjithshëm i Kosovës në Stamboll, Rrahim Morina i cili tha se janë të angazhuar plotësisht në baza ditore për rastin e ish kryeministrit Rexhepi.

Megjithatë, në këtë njoftim të Kuvendit, nuk bëhet e ditur gjendja shëndetësore e ish kryeministrit Rexhepi, i cili kishte pësuar dy sulme në tru, dhe pas trajtimit fillestar në Kosovë, është dërguar për trajtim të mëtutjeshëm në Turqi.