Spitali i Vushtrrisë kërkon t’i shtohet stafi mjekësor dhe specialistë

2017-03-10 në ora 14:57

Një delegacion i Ministrisë së Shëndetësisë dhe Shërbimit Spitalor Klinik Universitar të Kosovës, i përbërë nga dr. Rrustem Musa, zëvendësministër i Shëndetësisë dhe dr. Curr Gjocaj, drejtor i SHSKUK,  ka vizituar të premten Spitalin e Përgjithshëm “Sheikh Zayed” në Vushtrri.

Në takim me drejtorin e këtij institucioni dr. Hajrullah Saraçi, delegacioni u njoftua në lidhje me punën që po bëhet në këtë spital pas renovimit, sfidat me të cilat po përballen, por edhe me nevojat që ka institucioni për shtim të  stafit mjekësor, thuhet në njoftim, transmeton Gazeta Shneta.

Drejtori Saraçi njoftoi se Spitali me repartet që ka në funksion po punojnë me kapacitete të plota, përderisa shtroj nevojën e shtimit të kuadrit të mesëm mjekësor dhe të specialistëve tjerë, përfshirë mjekët e emergjencës, urologjisë otorinolaringologjisë dhe ortopedisë.

Musa deklaroi se Ministria e Shëndetësisë do të përkrahë me kuadro mjekësore Spitalet e përgjithshme, në të cilat edhe do të jetë përqendrimi kryesor. “Ministria do të përqendrohet tek punësimi specialistëve tek spitalet e përgjithshme të cilat kanë më shumë nevojë”,  theksoi ai.  Sipas tij, përkrahja e MSH për këtë Spital do të vazhdojë edhe më tutje.

Në anën tjetër, Gjocaj tha se kanë ardhur që nga afër të njoftohen me punën që po bëhet në këtë spital të rinovuar së fundmi, por edhe për të dëgjuar kërkesat dhe nevojat që ka spitali.

“Do të përqendrohemi në përkrahje të spitaleve të përgjithshme të cilat edhe mund të shndërrohen si qendra referente për profile të caktuara mjekësore.  Në bashkëpunim me MSH, do kërkojmë që punësimet e mjekëve specialistë të përqendrohen tek  spitalet e përgjithshme që kanë nevoja të mëdha” citohet Gjocaj në njoftim.

Ndërsa Ferati, drejtor i administratës në këtë spital,  tha se ka pasur vazhdimisht ulje të buxhetit nga disa kategori, përfshirë edhe kategorinë e pagave,  por edhe ato komunale.

Në lidhje me kërkesat e paraqitura, u tha se gjatë  rishikimit buxhetor por edhe në  kornizën afatmesme të  shpenzimeve buxhetore dhe dëgjime buxhetore do të përcillen shqetësimet tek Ministria e Financave.

Delegacioni nga afër vizitoj  disa nga repartet e spitalit dhe bisedojë me pacientët  në lidhje me trajtimin  që po u bëhet nga stafi mjekësor i këtij institucioni. /Gazeta Shneta/