Ka ndërruar jetë në moshën 59-vjeçare Richard Scolyer, mjeku australian që tërhoqi vëmendjen e botës pasi iu nënshtrua një trajtimi eksperimental unik për një tumor agresiv në tru, duke përdorur mbi veten zbulimet shkencore që ai vetë kishte ndihmuar të zhvilloheshin.
Scolyer u diagnostikua në vitin 2023 me glioblastomë, një nga format më agresive dhe vdekjeprurëse të kancerit të trurit. Në vend që të pranonte trajtimin standard, ai vendosi të provonte një qasje të re së bashku me kolegen dhe mikeshën e tij, Georgina Long. Trajtimi u bazua në suksesin e tyre të mëparshëm në luftën kundër melanomës së avancuar, një formë e rrezikshme e kancerit të lëkurës, shkruan BBC transmeton Gazeta Shneta.
Si bashkëdrejtues të Institutit Australian të Melanomës, dy shkencëtarët kishin revolucionarizuar trajtimin e melanomës përmes imunoterapisë, duke rritur ndjeshëm normat e mbijetesës. Falë punës së tyre, rreth gjysma e pacientëve me melanoma të avancuar sot konsiderohen praktikisht të shëruar, krahasuar me më pak se 10% një dekadë më parë.
Në rastin e tumorit të trurit, Scolyer u bë pacienti i parë në botë që mori një kombinim imunoterapie para ndërhyrjes kirurgjikale, së bashku me një vaksinë të personalizuar të krijuar sipas karakteristikave të tumorit të tij.
Edhe pse shanset për shërim ishin minimale, skanimet pas trajtimit treguan shenja inkurajuese të reagimit imunitar, duke çuar në nisjen e një studimi klinik në Shtetet e Bashkuara për të testuar metodën tek pacientë të tjerë.
I shpallur ‘australian i vitit’ në 2024-tën, së bashku me shkencëtaren Long, ai u vlerësua jo vetëm për kontributin e tij shkencor, por edhe për guximin me të cilin ndau publikisht betejën me sëmundjen.
Në letrën e tij të fundit, ai bëri thirrje që shkencëtarët të vazhdojnë të sfidojnë kufijtë e njohurive dhe qeveritë të investojnë në kërkim shkencor. “Mund dhe duhet të vazhdojmë të shtyjmë kufijtë përpara në luftën kundër kancerit”, shkroi ai.
Scolyer la pas bashkëshorten e tij dhe tre fëmijët, ndërsa trashëgimia e tij shkencore vazhdon të ndikojë në trajtimin e kancerit në mbarë botën. /Gazeta Shneta/