12 teknikë nuk janë gjendur në vendin e punës në Klinikën Emergjente në QKUK, gjatë një inspektimi të kryer nga Komisioni për Kontroll të brendshëm më datën një nëntor
Mëngjesi i datës një nëntor nuk i gjeti në vendin e punës 12 teknikë në Klinikën Emergjente në QKUK, shkruan Gazeta Shneta.
12 punëtorë të kësaj klinike nuk ishin në vendin e punës së tyre rreth orës 08:30, kohë kjo kur klinika u inspektua nga Komisioni për Kontrolle të Brendshme.
Gazeta ka mësuar emrat e teknikëve që kanë munguar në vendin e punës: D.Xh; E.B; V.A; S.A; L.G; Sh.B; E.K; R.D; M.K; R.M; M.Th; A.I; Sh.Sh; V.B; N.M.
“Për shkak të përgjegjësisë dhe obligimeve që dalin me ligj obligohen të jenë në vendin e punës më së voni 07:15. Kërkoj nga Komisioni Disiplinor që të merren masa ndaj personave në fjalë për mos zbatim të detyrave dhe obligimeve të punës”, ka rekomanduar Komisioni për Kontroll të Brendshëm.
Rastin e mungesës së teknikëve në punë e ka konfirmuar vet drejtori i Klinikës Emergjente Dr. Basri Lenjani. Ai ka thënë se është kërkuar që të gjithë të procedohen në Komisionin Disiplinor.
“Komisioni i Brendshëm i QKUK-së ka bë inspektime të rregullta dhe ka evidentuar se nuk janë gjetur në vendin e punës disa punëtorë në Klinikën Emergjente. Nga Komisioni kemi kërkuar të gjithë ata të cilët kanë bë shkelje në vendin e punës të procedohen në Komisionin Disiplinor. Komisioni Disiplinor automatikisht ka proceduar të gjithë ata punëtorë të cilët nuk ishin në vendin e punës. Poashtu me Komisionin Disiplinor jemi dakorduar për çdo shkelje në vendin e punës pa justifikim të procedohen për masa disiplinore. Do të jam përkrahës dhe mbështes”, ka deklaruar Lenjani.
Megjithatë Lenjani nuk e ka konfirmuar nëse grupi prej 12 vartësve të tij janë proceduar në Komisionin Disiplinor. /Gazeta Shneta/