Autoritetet shëndetësore në Krahinën Autonome Baske të Spanjës kanë nisur një hetim pasi 253 persona, përfshirë dhjetëra foshnje, janë vaksinuar me doza të skaduara gjatë një periudhe dy mujore në sistemin publik shëndetësor.
Rasti u bë publik pas një ankese të paraqitur nga grupi parlamentar EH Bildu në Parlamentin Bask, shkruan Euronews, përcjell Gazeta Shneta.
Sipas autoriteteve, deri më tani nuk është raportuar asnjë efekt anësor tek personat që kanë marrë vaksinat e skaduara, ndërsa të gjithë të prekurit janë identifikuar dhe janë kontaktuar.
Vaksinat e skaduara i përkasin vaksinës heksavalente, e cila është pjesë thelbësore e kalendarit të imunizimit të fëmijëve dhe mbron nga gjashtë sëmundje: difteria, tetanosi, kolli i mirë, Haemophilus influenzae tipi B, poliomieliti dhe hepatiti B.
Sipas sistemit shëndetësor bask, Osakidetza, injeksionet e dhëna “nuk paraqesin asnjë rrezik për shëndetin dhe nuk shkaktojnë efekte anësore”.
Megjithatë, për të garantuar mbrojtje të plotë, autoritetet shëndetësore, Agjencia Kombëtare e Barnave, Këshilli Këshillimor i Vaksinave dhe prodhuesi i vaksinës kanë rekomanduar rivaksinimin e të gjithë personave të prekur.
EH Bildu ka akuzuar Osakidetza-n për dështim në monitorimin e afateve të skadencës dhe zbatimin e protokolleve, duke pretenduar se disa pacientë kanë marrë madje dy doza të skaduara. Vaksinat janë administruar në 12 nga 13 organizatat e integruara shëndetësore të Krahinës Baske.
Ministri bask i Shëndetësisë, Alberto Martínez, ka deklaruar se “çdo rast është identifikuar me saktësi dhe familjet po kontaktohen për t’u informuar dhe për t’u ofruar udhëzimet e nevojshme”. Qendrat shëndetësore kanë nisur tashmë caktimin e termineve për rivaksinim.
Ky është skandali i dytë i lidhur me vaksinat në muajt e fundit në këtë rajon. Në shtator 2025 nisi një gjykim ndaj një infermiereje pediatrike në Santurtzi, e akuzuar se kishte hedhur vaksinat duke pretenduar se po vaksinonte fëmijët, çka dyshohet se la mbi 400 fëmijë pa imunizim gjatë viteve 2021–2022.
Dy incidentet kanë ngritur shqetësime serioze për mbikëqyrjen dhe protokollet e administrimit të vaksinave në sistemin shëndetësor bask, ndonëse autoritetet insistojnë se rasti i fundit nuk ka pasoja shëndetësore për të prekurit./Gazeta Shneta/