Numri i pacientëve që presin për koronarografi në QKUK mbetet shqetësues, pavarësisht një uljeje të ndjeshme krahasuar me të kaluarën. Aktualisht, rreth 2 mijë pacientë janë në listën e pritjes për këtë procedurë diagnostikuese të sëmundjeve ishemike të zemrës.
“Lista aktive e pacientëve që presin për koronarografi elektive është rreth 2,000 raste. Kjo paraqet një rënie të ndjeshme nga mbi 4, 600 raste sa kemi trashëguar në fillim të mandatit aktual,” deklaroi për Front Online, drejtori i Klinikës së Kardiologjisë, Faik Shatri.
Ai tha se janë përfunduar të gjitha rastet e vitit 2023 dhe është filluar me trajtimin e pacientëve të regjistruar në vitin 2024, por koha e pritjes për rastet elektive vazhdon të jetë rreth një vit.
“Pacientët me indikacione urgjente nuk përfshihen në këtë listë dhe trajtohen menjëherë”, sqaroi ai. Rastet me infarkt akut ose gjendje kërcënuese trajtohen brenda ditës ose menjëherë pas stabilizimit klinik.
Shatri theksoi se Klinika po përballet me sfida serioze për shkak të rritjes së kërkesës, plakjes së popullsisë dhe mungesës së stafit infermieror. “Kemi ndërmarrë masa për riorganizimin e shërbimeve dhe për menaxhimin aktiv të listave të pritjes”, tha ai.
Aktualisht po ndërtohet një sallë e dytë për procedura invazive që pritet të vihet në funksion deri në tetor.
Intervistën e plotë mund të gjeni këtu. /Gazeta Shneta/