Ardiana Bushi është 24-vjeçarja nga Kosova e cila është edhe studentja e parë që u bë pjesë e CERN-it, i cili është një nga laboratorët më të mëdhenj në botë për fizikë nukleare.
Ajo është zgjedhur në mesin e 1424 personave sa kanë aplikuar gjithsej nga e gjithë bota.
Studentja e Fizikës në Universitetin e Prishtinës, e cila vjen nga Hani i Elezit, është përzgjedhur për të marrë pjesë në “CERN Summer Students Programme”, ku do të kryej praktikën në qendrën më të madhe për hulumtime shkencore dhe në një nga laboratorët më të mëdhenj në botë për fizikë të grimcave.
Për të rrëfyer për eksperiencën të cilën ajo po e pret me padurim, studentja kosovare, për “Zëri.info” ka thënë se të qenët pjesë e CERN-it ka qenë një ëndërr e saj shumëvjeçare, ashtu siç do të ishte për të gjithë studentët dhe fizikanët nëpër botë.
“Për mua të jem pjesë e CERN-it dhe të vlerësohem nga një laborator me renome botërore ka qenë ëndërr e imja shumëvjeçare, duke pasur parasysh se unë vij nga një qytet i vogël siç është Hani i Elezit”, ka rrëfyer 24-vjeçarja.
E për të arritur këtë sukses në një moshë kaq të re, Ardianës i është dashur shumë përkushtim e punë. Të gjithë përvojën që do ta marrë Ardiana gjatë qëndrimit të saj në Zvicër dhe Francë, ajo do ta rikthejë në Kosovë duke kontribuuar në vendlindjen e saj.
Ajo, po ashtu, do të jetë pjesë e projekteve shkencore dhe ligjëratave, që do të mbahen nga shkencëtarë me renome në fushën e fizikës.