Vajzat dhe gratë po vazhdojnë të jenë viktimat më të shpeshta të dhunës që përjetojnë qoftë nga bashkëshortët apo partnerët e tyre. Kjo dukuri shqetësuese ka marrë përmasa të mëdha kohëve të fundit.
Një ngjarje e rëndë dyshohet të ketë ndodhur së fundmi në Çagllavicë, ku një person po dyshohet se ka ushtruar dhunë ndaj të fejuarës së tij.
Burimet e Sinjalit kanë bërë me dije se viktima e ka denoncuar rastin në Polici dhe ka rrëfyer për dhunën dhe kërcënimet e vazhdueshme ndaj saj – sidomos gjatë kohës që ka qenë shtatzënë.
Sipas dëshmisë së saj, si pasojë e dhunës psikike dhe presionit, ajo e ka abortuar foshnjën, situatë kjo që e ka përjetuar shumë rëndë.
Si rezultat i denoncimit, njësitë policore kanë arrestuar të dyshuarin i cili është shoqëruar në stacion policor për intervistim.
Të njëjtat burime thonë se i dyshuari e ka mohuar se ka ushtruar dhunë ndaj viktimës.
Pas përfundimit të procedurave policore, Prokurori i Shtetit ka nxjerrë aktvendim që i njëjti të dërgohet në mbajtje për veprën penale ‘Dhuna në familje’.