Me rastin e Ditës së Tokës, organizata Let’s Do It Kosova ka realizuar një aksion të gjerë pastrimi në zonën e Liqeni të Badovcit.
Gjatë këtij aktiviteti, dhjetëra vullnetarë u angazhuan për orë të tëra në pastrimin e brezit rrugor dhe brigjeve të liqenit, duke kontribuar në përmirësimin e gjendjes mjedisore në një nga zonat më të rëndësishme natyrore pranë kryeqytetit.
Organizatorët kanë shprehur mirënjohje për të gjithë pjesëmarrësit, të cilët me përkushtim dhe energji u bënë pjesë e këtij aksioni.
Një falënderim i veçantë iu drejtua edhe institucioneve dhe kompanive që mbështetën aktivitetin, përfshirë KRM Pastrimi, KRU Prishtina dhe Teleperformance, si dhe mediat që e përcollën nga afër këtë nismë.
Nga “Let’s Do It Kosova” u theksua se aksione të tilla dëshmojnë se ndryshimi është i mundur kur qytetarët bashkohen për një qëllim të përbashkët. Megjithatë, sipas tyre, këto iniciativa nuk duhet të mbeten të vetmet përpjekje për ruajtjen e mjedisit.
Organizata ka bërë thirrje për institucionet përgjegjëse që të rrisin angazhimin dhe të ndërmarrin masa konkrete për mbrojtjen e mjedisit, në mënyrë që zona të tilla të mos kenë nevojë për pastrim të vazhdueshëm./Gazeta Shneta/