Qendra Klinike Universitare e Kosovës (QKUK) ka njoftuar se në Klinikën e Nefrologjisë është realizuar për herë të parë procedura e imunoadsorbimit (IA), një metodë e trajtimit ekstrakorporal të gjakut që përdoret në raste të caktuara të sëmundjeve të rënda.
Sipas njoftimit të QKUK-së, procedura është aplikuar te një pacient i lindur në vitin 1979, i diagnostikuar me vaskulit cANCA, një sëmundje inflamatore e enëve të gjakut që kishte prekur veshkat dhe mushkëritë.
Qëllimi i trajtimit ishte largimi i citokinave dhe antitrupave inflamatorë nga qarkullimi i gjakut, për të ndihmuar në kontrollimin e procesit inflamator dhe kufizimin e dëmtimeve të mëtejshme të organeve.
Procedura është realizuar nga ekipi i Klinikës së Nefrologjisë, i përbërë nga Dr. Siada Selmani, Dr. Vjollca Godanci Kelmendi dhe infermierja Njomza Maliqi Qirezi, me mbështetjen e stafit të Mjekimit Intensiv Qendror dhe teknikëve të aparaturës.
Sipas QKUK-së, seanca ka përfunduar pa komplikime dhe është shoqëruar me ulje të markerëve inflamatorë deri në 75 për qind. Imunoadsorbimi është përdorur si terapi plotësuese krahas plazmaferezës dhe trajtimeve të tjera imunosupresive.
Në njoftim thuhet se imunoadsorbimi i shtohet metodave të tjera të trajtimit ekstrakorporal të gjakut që ofrohen në Shërbimin Spitalor Klinik dhe Universitar të Kosovës (ShSKUK), përfshirë plazmaferezën dhe terapitë e vazhdueshme të zëvendësimit të funksionit renal (CRRT), të cilat përdoren në trajtimin e pacientëve me gjendje të rënda klinike./Gazeta Shneta/