Mungesa e kushteve esenciale nëpër institucionet shëndetësore të Kosovës ka nxitur 300 kosovarë të largohen nga vendi për trajtime mjekësore, sipas Zyrës për Informim nga Ministria e Shëndetësisë, shkruan Gazeta Zëri.
Zyrtarë për informim të këtij dikasteri gjithashtu kanë bërë të ditur për Gazetën Zëri se vitin e kaluar afro 2000 qytetarë kanë ndjekur të njëjtën rrugë për trajtim. Shpenzimet deri më tani kanë prekur shifren e 12 milionë eurove, shumë kjo e mbuluar nga Ministria e Shëndetësisë.
Kryetarja e Komisionit Parlamentar për Shëndetësi, Punë dhe Mirëqenie Sociale, Besa Baftiu, ka thënë për “Zërin” se në spitalet vendore ka mungesë të gjërave elementare të shëndetësisë dhe po ashtu ka mungesë edhe të barnave për leukemi, sëmundje e cila nuk po gjen shërim në vend.
Në anën tjetër, edhe pse pacientët kërkojnë të shkojnë për shërim në shtetet ku u është rekomanduar, ka raste kur atyre u refuzohet kërkesa dhe në këtë mënyrë duhet të dërgohen në një shtet tjetër.
Mirëpo, jo çdo kosovar ka mundur të gjejë shërim jashtë vendit. Djali njëmuajsh i familjes Leka nga Gjilani pas kthimit nga Turqia, ku edhe po trajtohej, ka vdekur nga sëmundja.
Shkrimin e plotë mund ta gjeni në Gazetën Zëri.