Kosova, me mbi një mijë kosovarë të diagnostikuar me sëmundjen ngjitëse të tuberkulozit, renditet si vendi i parë në Evropë për nga numri i rasteve që bartin këtë sëmundje.
Bazuar në të dhënat që prezantojnë profesionistët shëndetësorë, gjatë vitit 2017 rreth 1 mijë kosovarë janë prekur nga tuberkulozi. Kështu i ka thënë të martën Express’it, pulmologu Skender Baca.
Baca ka treguar se tuberkulozi më së shumti po i prek personat që jetojnë në komunitete apo bashkësi.
Sipas tij, qendrat e lokalizuara në Kosovë mbeten Kaçaniku, Lipjani dhe Podujeva. Për sa i përket mjekimit fillestar, ai thotë se zgjat deri në gjashtë muaj.
“Organi që më së shumti po ua prek tuberkulozi kosovarëve është mushkëria, pastaj ashti, pastaj pëlhura e barkut si dhe e zemrës. Tuberkulozi kohëve të fundit po i prek edhe organet gjenitale të femrave”, ka thënë Baca për Express.
Ndërkohë, koordinatorja Kombëtare për TB, dr. Majlinda Gjocaj, në ditën Botërore të Tuberkulozit tha se gjatë këtyre viteve vërehet një rënie e madhe e rasteve me tuberkuloz. Kjo pasi që më 2001 numri i të prekurve me TB në Kosovë ishte 1674 duke rënë vazhdimisht, deri në 717 për vitin 2016.
Tuberkulozi është një sëmundje ngjitëse, i cili nëpërmjet rrugëve të frymëmarrjes arrin në organizëm. Faktorët, si: imuniteti i dobët, kushtet e vështira të jetesës, si dhe kequshqyerja e bëjnë personin më të ndjeshëm ndaj kësaj sëmundjeje.
Shkrimin e plotë mund ta lexoni në Express.