Ndërtimi i klinikës së re të Pediatrisë në QKUK, pritet të fillojë në muajin maj. Projekti është donacion nga Fatima bint Mubarak, nëna Mbretëreshë e Emirateve të Bashkuara Arabe, emrin e së cilës do ta mbaj spitali. “Mabetex” ka fituar tenderin 22 milionësh ndërkombëtar të shpallur në EBA
Në vitin 2004 Prof. Dr. Nexhmi Hyseni ngriti idenë mbi nevojën e ndërtimit të një kompleksi spitalor universitar të fëmijëve, dhe tani pritet së shpejti të fillojë ndërtimi i tij. Projekti do të financohet nga Fatimabint Mubarak, nëna Mbretëreshë e Emirateve të Bashkuara Arabe, emrin e së cilës do ta mbajë spitali.
Spitali i ri i fëmijëve i cili do të kushtojë 22 milionë euro, do të ndërtohet nga kompania “Mabetex”, pronë e zëvendëskryeministrit dhe ministrit të Punëve të Jashtme, BehgjetPacolli.
Dr. NexhmiHyseni në një bisedë për Gazeta Shneta, thotë se Kosova ka pasur dhe vazhdon të ketë natalitetin më të madh në Evropë, por kushtet në të cilat mjekohen fëmijët nuk janë të favorshme.
“Prandaj është menduar se Kosova ka pasur nevojë për një spital të tillë, pasi aktualisht pacientët e vegjël janë të shpërndarë në disa klinika në QKUK. Një fëmijë mund të pësojë trauma nëse gjendet në të njëjtën dhomë me një të moshuar në urologji i cili sapo ka dal nga operacioni i prostatës”, shprehet mjeku.
Për këtë arsye, shton ai, gjithkund në botë të gjithë fëmijët janë në një ndërtesë ku zhvillohen të gjitha disiplinat për trajtimin e tyre. Spitali i ri do t’i bashkojë në një ndërtesë pediatrinë, kirurgjinë e fëmijëve dhe neonatologjinë, shkruan Gazeta Shneta.
“Kërkesa jonë ishte pranuar nga Ministria e Shëndetësisë, e cila ne vitin 2008 kishte ndarë 4 milionë euro, por që më vonë ishin tërhequr. Projektin e pati kryer një arkitekt me emrin Baton dhe e kishte dhënë falas, por fatkeqësisht nuk u realizua”.
Dr. Hyseni thotë se ishte angazhuar në disa ambasada në kërkim të një donatori për ndërtimin e spitalit. Ndihmesë të madhe ai ia atribuon ish-ministrit Ferid Agani i cili e ka mbështet këtë ide dhe projekt në kohen kur ishte ministër i Shëndetësisë. Më pastaj në këtë drejtim kishte ndihmuar edhe ish-Presidentja Atifete Jahjaga e cila kishte nënshkruar marrëveshjen në vitin 2015.
Kirurgu thotë se gjatë këtyre negociatave për marrjen e donacionit dhe përfundimin e projektit kanë hasur në shumë pengesa. Megjithatë, ai tregon se ndërtimi pritet të nis në fillim të muajit maj dhe do të përfundojë brenda 22 muajve.
“Spitali do të jetë universitar për trajtimin e fëmijëve ku do të ketë të gjitha shërbimet, laboratorëve, diagnostikës, intensivën, sallat e operacionit, me kushte jashtëzakonisht të mira dhe pajisje të avancuara, të gjitha këto në 10 mijë e 200 metra katror”.
Dr. Hyseni thotë se spitali i ri nuk do të ketë kardiokirurgji për shkak të mjeteve financiare jo te mjaftueshme . Sipas tij, ky repart do të kushtonte shumë dhe kjo është paraparë që të bëhet në të ardhmen.
Projekti ishte paraparë të përfundonte në vitin 2017, por është vonuar për shkak të punëve përgatitëse të terrenit të cilat ishin marr përsipër nga Ministria e Shëndetësisë. /Gazeta Shneta/