Infermierët e Qendrës Klinike Universitare të Kosovës kanë dal sërish në protestë gjatë ditës së sotme. Ata po kërkojnë që koeficienti për pagat e tyre në projektligj të ndryshohet. Infemierët iu kanë bërë thirrje deputetëve që t’i realizojnë kërkesat e tyre
Miratimi i projektligjit për paga nga Komisioni për Administratë, ka ngjallur pakënaqësi tek infemierët të cilët po thonë se pozicionimi i tyre në vetëm dy kategori si dhe me koeficientët 2.25 dhe 2.2 nuk është as asfër kërkesave të tyre.
Kryeinfermierja e Klinikës së Pulmologjisë në QKUK, Arta Sejdiu, ka thënë se kërkesat e tyre janë që koecifienti të përcaktohet duke vlerësuar nivelin arsimor, rrezikshmërinë në punë, si dhe përgjegjësitë të cilat dallojnë nga specifikat e vendeve të punës, shkruan Gazeta Shneta.
“Këto tri pika janë shkelur në mënyrë flagrante tek infermierët dhe pakënaqësia jonë është thelluar edhe më shumë kur në listë kemi parë profesionistë të tjerë shëndetësor që kanë po të njëjtin shkollim dhe janë ranguar me koeficient më të lartë sesa ne”, ka deklaruar Sejdiu.
Ajo ka theksuar se një infermiere në vendin e saj të punës përballet çdo ditë me vuajtje, dhimbje e vdekje të pacientëve. “Prandaj ne sot sërish jemi detyruar të protestojmë për të drejtat tona. Infermierët e përbëjnë shumicën e punëtorëve shëndetësor dhe janë shtylla e tri niveleve të shëndetësisë, prandaj është e patolerueshme trajtimi që po na bëhet me këtë projektligj”, ka shtuar Sejdiu.
Ajo ju ka bërë thirrje deptuetëve që t’i marrin parasyshë kërkesat e tyre në kohën kur pritet të votohet ligji në seancën e Kuvendit. “Nëse kërkesa jonë ju duket e tepërt dhe jo reale, ju ftojmë të shihni për së afërmi punën tonë. Është përgjegjësi e jona t’i zbatojmë në përpikmëri rregulloret e përcaktuara nga ju, ndërsa është e juaja që t’i realizoni kërkesat tona”, ka thënë kryeinfermierja Sejdiu.
Protestën e infermierëve e kanë përkrahur edhe Sindikata e QKUK-së, si dhe Oda e Infermierëve të Kosovës. Kryetari i OIK-ut, Naser Rrustemaj, ka thënë se kërkesat e tyre janë legjitime dhe duhet të merren parasyshë nga institucionet. /Gazeta Shneta/