Oda e Mjekëve të Kosovës ka lëshuar një qarkore njoftuese për spitalet private, ku janë paralajmëruar se do të hetohen dhe gjobiten nëse mjekët e huaj që punojnë në këto institucione nuk anëtarësohen në OMK dhe nuk komunikojnë me pacientët në gjuhën shqipe. Poashtu OMK ka kërkuar që këta mjek të anëtarësohen në odë, ndryshe do të gjobiten. Llogaritet që rreth 150 mjekë të huaj punojnë ilegalisht në Kosovë
Oda e Mjekëve të Kosovës do të marr masa për mjekët e huaj që punësohen në spitalet private në Kosovë, e të cilët nuk komunikojnë në gjuhën shqipe me pacientët. Një një qarkore informuese për spitalet private, OMK deklaron se në shumë raste mjekët e huaj kanë lëshuar raporte, udhëzime apo receta në gjuhë të huaja, shkruan Gazeta Shneta.
“Ne si OMK e vlerësojmë si shqetësues këtë fakt duke pas parasysh faktin se shkelen të drejtat e pacientit për informim të drejtë dhe të kuptueshëm sipas Nenit 29 të Kodit Etik të Deonologjisë Mjekësore”, thuhet në letrën e Odës e cila udhëhiqet nga kryetari Dr. Pleurat Sejdiu.
Nëse nuk respektohet ligji, atëherë OMK ka paralajmëruar spitalet private se do të iniciojnë hetime për të gjithë mjekët e huaj. Nga këta të fundit poashtu është kërkuar që të anëtarësohen në Odë, pasi një gjë të tillë e kanë të obligueshme edhe me ligj.
“Meqenëse një numër i madh i mjekëve të huaj që ushtrojnë veprimtarinë e tyre mjekësore pranë institucioneve të cilat ju i udhëhiqni nuk janë të anëtarësuar ende pranë OMK-së, ju njoftojmë se ndaj tyre do të fillohet procedura e hetimit pranë organit gjegjës të OMK-së, i cili ka të drejtë të shqiptojë gjobë ndëshkuese për çdo muaj në shumën prej 30 euro, nën kërcënimin e ekzekutimit të dhunshëm në procedurë përmbarimore”, thuhet në letrën e OMK-së. /Gazeta Shneta/