Kohë më parë, Shezije Morina, ka lindur dy fëmijët në Qendrën e Mjekësisë Familjare në Kamenicë, derisa funksionalizimin e shërbimit të maternitetit e sheh si diçka shumë të nevojshme.
E, njëjtë mendon edhe Hanife Berisha. Ajo thotë se për çdo kontrolle detyrohen të shkojnë në spitalin e Gjilanit.
Krejt çfarë ka mbetur brenda këtij korridori në Shërbimin e Maternitetit, janë disa fotografi ku tregohen shenjat e rrezikut gjatë shtatzënisë.
Mënyra e të ushqyerit me gji për foshnjën, janë disa informacione tjera që kanë mbetur të vendosura në muret e këtij objekti.
Ndërkaq, Ylber Thaçi, drejtor i Qendrës së Mjekësisë Familjare në Kamenicë, thotë se nuk kanë kuadro të mjaftueshëm për të mbajtur në funksion maternitetin. Thaçi tregon se për të pranuar një gjinekolog kanë hapur edhe konkurse. Mirëpo një konkurs i tillë ka dështuar, pasi nuk është paraqitur askush.
Ndërkohë, sipas udhëzimit administrative nr.08/2017 për Organizimin, strukturën dhe përcaktimin e shërbimeve e veprimtarisë së Institucioneve të kujdesit parësor shëndetësor, neni 14, pika 2, obligon që në QKMF ku funksionojnë maternitetet, është I domosdoshëm Gjinekologu dhe Neonatologu ose Pediatri.
Më tutje, Thaçi, thotë se më herët kanë pasur një marrëveshjeje me spitalin e Gjilanit ku për një kohë të caktuar merrnin nga një gjinekolog, por për shkak të një problemi është ndërprerë bashkëpunimi mes tyre.
Ditë më parë, në Kamenicë ka ndodhur një lindje jo e zakonshme ku në tregun e këtij qyteti Xhejlane Mehmeti lindi fëmijën e saj të gjashtë./InFokus/