Komuna e Vushtrrisë ka lidhur kontratë me kompaninë “M Holding” për të studiuar ndikimin e pandemisë Covid-19 në ekonominë e komunës. Kjo kontratë buxhetit të Vushtrrisë do t’i kushtojë 140 mijë euro
Ende pa përfunduar asgjë, e madje kur pritet që pandemia e shkaktuar nga virusi Sars-Cov-2 të ketë një valë të dytë në Kosovë, komuna e Vushtrrisë ka ndarë 140 mijë euro për të studiuar ndikimin e kësaj situate në ekonomi, shkruan Gazeta Shneta.
Në fillim të muajit shtator komuna e udhëhequr nga Xhafer Tahiri i LDK-së, ka iniciuar një kontratë me titull “Studimi mbi ndikimin e pandemisë Covid-19”. Në përshkrimin e njoftimit thuhet se studimi ka të bëj me ndikimin e pandemisë në ekonominë e komunës.
“Ka të bëj me studimin mbi ndikimin e pandemisë COVID-19 në ekonominë lokale formale e jo formale të Komunës së Vushtrrisë dhe mast për rimëkëmbje ekonomike pas pandemisë së shkaktuar nga virusi COVID-19, për më shumë informata referohu specifikimeve teknike në dosjen e tenderit. Aneksi nr.1”, thuhet në njoftim, transmeton gazetashneta.
Ndërkaq në Aneksin nr.1 të dosjes së tenderit thuhet se kjo kontratë është bërë me kërkesë të Shtabit Emergjent të komunës, ndërsa është miratuar edhe nga Kuvendi Komunal.
Për këtë kontratë e cila vlerën e parashikuar e ka pasur 165 mijë euro, kanë konkurruar tri kompani. “ISD” LLC kishte ofertuar me 163 mijë e 450 euro; “Kolegji i Menaxhmentit Internacional Globus” ka ofertuar 163 mijë e 600 euro, ndërsa “M Holding” SHPK ofertoi me 148 mijë e 751 euro.
Në njoftimin për nënshkrimin e kontratës bëhet e ditur se kontrata i është dhënë kompanisë “M Holding” me vlerë 140 mijë euro.
Komuna e Vushtrrisë ka qenë një nga më të prekurat nga Covid-19 në Kosovë. /Gazeta Shneta/
