Klinika e Neurokirurgjisë në QKUK ka referuar pacientë për trajtim jashtë vendit me arsyetimin e mungesës së neuro-anesteziologut. Kjo kërkesë po konsiderohet e pa-arsyeshme pasi në Kosovë por edhe në Evropë nuk ka specialist të neuro-anestezionit, por ka vetëm anesteziolog me mjekim intensiv
Klinika e Neurokirurgjisë në QKUK e cila udhëhiqet nga Dr. Arsim Morina, ka referuar shtatë raste për trajtim jashtë institucioneve publike në kuadër të Fondit të Ministrisë së Shëndetësisë, shkruan Gazeta Shneta.
Gazeta ka marr vesh nga burime se këto raste janë referuar me arsyetimin se në klinikë mungon neuro-anesteziologu për t’i përgatitur për operacion.
Këtë e ka konfirmuar edhe kryesuesi i Bordit për vlerësimin mjekësor të rasteve që kanë nevojë për trajtim jashtë vendit, Dr. Fadil Beka.
“Kemi pranuar 7 ose 8 raste nga Klinika e Neurokirurgjisë për trajtim jashtë institucioneve publik. Arsyetim për këtë është dhënë mungesa e neuro-anesteziologut. Ne kemi kërkuar një interpretim nga Klinika e Anestezionit përmes drejtorit të SHSKUK-së për këtë çështjen e neuro-anesteziologut. Poashtu kemi kërkuar sqarime shtesë nga Klinika e Neurokirurgjisë, por këtë të fundit ende nuk e kemi marr. Sapo të marrim, do t’i shqyrtojmë dy anët dhe do të vendosim”, ka deklaruar Beka.
Dr. Nehat Baftiu, drejtor i Klinikës së Anestezionit me Mjekim Intensiv në QKUK, ka deklaruar se në Kosovë por as në Evropë nuk ka diplomë dhe as licencë pune për neuro-anesteziologji.
“Shkollimi specialistik ka hyrë në program në vitin 2000 dhe zgjat 5 vjet. Ne të gjithë anesteziologët që kemi diplomuar mbajmë titullin specialist i anestezionit dhe mjekimit intensiv. Asnjë anesteziolog në Kosovë i diplomuar pas vitit 2000, nuk ka titull tjetër. Në Kosovë por as në Evropë nuk ka diplomë të neuro-anesteziologut ose kardio-anesteziologut. Nuk ka as licenca të tilla. Ne të gjithë ndjekim kursin 5-vjeçar të specializimit dhe punojmë në të gjitha sallat”, ka deklaruar Baftiu.
Këtë e ka konfirmuar edhe kryetari i Odës së Mjekëve të Kosovës Dr. Pleurat Sejdiu. Sejdiu ka thënë se OMK lëshon licencat e punës në bazë të diplomave të shkollimit specialistik. Ai ka konfirmuar se në Kosovë nuk ka licenca të punës për anesteziolog të lëmive kirurgjike, por vetëm specialistë të anestezionit me mjekim intensiv dhe anestezion me reanimim.
Gazeta ka kërkuar sqarime edhe nga drejtori i Klinikës së Neurokirurgjisë, Dr. Arsim Morina, por ai nuk ka kthyer përgjigje. Këto referime me arsyetimin e mungesës së neuro-anesteziologut nga Neurokirurgjia vijnë vetëm disa muaj pas pensionimit të bashkëshortes së Morines, Dr. Qamile Morina. Bashkëshortët kirurg-anesteziologe, kanë punuar bashkë në sallën e Neurokirurgjisë.
Krejt në fund Dr. Fadil Beka nga Bordi për trajtim jashtë institucioneve publike, ka thënë se do të ndiqen të gjitha procedurat e parapara me ligj në mënyrë që pacientët të mos pësojnë.
“Ne duam që pacientët të mos dëmtohen, por duhet t’i ndjekim procedurat ligjore para se të marrim vendimin për miratim ose refuzim”, ka deklaruar Beka. /Gazeta Shneta/