Gjatë ditës së sotme në Qendrën Klinike Universitare është bërë kaos me vetura pasi i ka skaduar kontrata kompanisë që i mirëmbante laurat. Gazeta Shneta ka mësuar se QKUK po planifikon t’ia jap hapësirat e parkingut në shfrytëzim ndërmarrjes së komunës së Prishtinës “Prishtina Parking”.
Në Qendrën Klinike Universitare të Kosovës gjatë ditës së sotme është bërë kaos dhe kolona të gjata të veturave. Kjo për shkak se kompania që i mirëmbante laurat në hyrje/dalje, i ka skaduar kontrata, shkruan Gazeta Shneta.
Menaxhmenti i SHSKUK-së ka vendosur që të mos iniciojë procedurë të re për këtë çështje, pasi siç ka mësuar Gazeta Shneta, po planifikon që hapësirat e parkingut brenda QKUK-së t’ia jap në shfrytëzim ndërmarrjes së kryeqytetit “Prishtina Parking”.
Gazeta ka mësuar se kjo çështje është diskutuar edhe në një takim që ka pasur para disa ditësh ud. drejtoresha e SHSKUK-së Pranvera Zejnullahu-Raçi, me kryetarin e komunës së Prishtinës Përparim Rama.
Megjithatë se si do të implementohet kjo marrëveshje ende nuk është bërë e qartë.
Sqarim për këtë çështje nuk kanë dhënë as nga SHSKUK dhe as nga komuna e Prishtinës, në pyetjet që i ka dërguar Gazeta tash e dy javë. /Gazeta Shneta/