Ministri i Shëndetësisë Arben Vitia ka takuar sot disa anesteziologë të pensionuar nga spitalet dhe klinikat e SHSKUK-së. Vitia ka diskutuar me ta rikthimin e mundshëm në shërbim.
Ministri Arben Vitia ka takuar disa anesteziologë të pensionuar nga spitalet publike të SHSKUK-së. Sipas një njoftimi nga Ministria e Shëndetësisë, Vitia ka diskutuar me anesteziologët rikthimin e mundëshëm të tyre në shërbimet publike, shkruan Gazeta Shneta.
Sipas njoftimit, MSH synon që t’i trajtoj me prioritet anesteziologët numri i të cilëve është mjaft i vogël në klinikat e QKUK-së dhe spitalet e përgjithshme.
“Gjithashtu, ministri Vitia informoi të pranishmit së një prej prioriteteve të tij mbetet ofrimi i shërbimeve sa më cilësore për pacientët, por edhe plotësimi i bazës ligjore që mundëson trajtim me prioritet të kuadrit deficitar shëndetësor”, thuhet në njoftim.
Njoftimi i plotë:
Sot, Ministri Shëndetësisë, Arben Vitia u takua me anesteziologët e pensionuar me të cilët diskutoi sfidat me të cilat ballafaqohen sektorë të caktuar në sistemin e shëndetësisë, planifikimet dhe hapjen e mundësisë që të kontribuojnë të gjithë, pa dallim moshe. Veçanërisht kur përvoja e profesionistëve shëndetësor që një jetë të tërë ia kanë kushtuar shëndetit publik, janë grupe të besueshmërisë së lartë për avancimin dhe përmirësimin e sistemit shëndetësor dhe duhet të trajtohen si një aset i çmuar.
Në kuadër të objektives për ofrimin e shërbimeve cilësore dhe shtimin e kapaciteteve profesionale, ministri Vitia tha se këshillat e tyre në çdo kohë janë të mirëseardhura si dhe mbetet i hapur për bashkëpunimin profesional me anesteziologët e pensionuar.
Gjithashtu, ministri Vitia informoi të pranishmit së një prej prioriteteve të tij mbetet ofrimi i shërbimeve sa më cilësore për pacientët, por edhe plotësimi i bazës ligjore që mundëson trajtim me prioritet të kuadrit deficitar shëndetësor.
Anesteziologët e pranishëm e falënderuan ministrin Vitia, si dhe ofruan përvojën e tyre në dispozicion për formësimin e kuadrove të ardhshëm të bazuar në përvojën e tyre profesionale dhe jetësore.