Ministria e Shëndetësisë ka realizuar një procedurë emergjente për blerjen e vaksinave në vlerë mbi 418 mijë euro nga kompania “Meditech”.
Ministria e Shëndetësisë do të furnizohet me vaksina “DtaP-IPV-Hib”, e cila është një vaksinë e kombinuar kundër sëmundjeve tetanosit, difterisë, pertusis (kolla e mirë), virusit haemophilus influenzae b (Hib), poliomielitit dhe hepatitit B, shkruan Gazeta Shneta.
Për këtë vaksinë MSH ka paguar 418 mijë e 600 Euro përmes një procedure emergjente.
Procedura është udhëhequr nga zyrtari i prokurimit të MSH-së Berat Marmullaku dhe tenderi i është dhënë kompanisë “Meditech”.
“Ministria e Shëndetësisë shpërblen me kontratë operatorin ekonomik ‘Meditech’ SHPK nga Prishtina në vlerë totale të ofertës së negociuar prej 418,600 Euro”, thuhet në vendimin e Marmullakut. /Gazeta Shneta/