Ky është objekti i ri i Spitalit të Përgjithshëm të Ferizajt, i cili ka nisur të ndërtohet në korrik 2018.
Projekti është investim i Ministrisë së Shëndetësisë.
Objekti ka mbetur në këtë gjendje që disa vite dhe është mbushur plot ujë brenda dhe përreth tij. E për të hequr ujin MSH duhet t’i shpenzojë mbi 41 mijë euro përmes një tenderi që e ka iniciuar rishtas, shkruan Gazeta Shneta.
Për këtë kontratë kanë aplikuar pesë operatorë ekonomik. Oferta më e lirë është mbi 29 mijë Euro, ndërsa më e shtrenjta është mbi 39 mijë Euro.
Kjo është kosto shtesë që MSH duhet ta paguaj pasi objekti ka mbetur në këtë gjendje tash e disa vite. Ministria e Shëndetësisë kishte planifikuar të investonte mbi 10 milionë Euro.
Por operatorit ekonomik nuk i kishin mjaftuar këto dhe kishte kërkuar edhe disa miliona shtesë.
Pas kësaj kërkesë MSH i kishte bërë kallëzim penal kompanisë për mashtrime në kryerjen e punimeve. Në anën tjetër ish-ministri Rifat Latifi kishte nënshkruar një memorandum me UP-në me anë të të cilit Fakulteti i Ndërtimtarisë do të bënte një vlerësim të punimeve të kryera deri më tani.
Por MSH nuk i ka dhënë përgjigje Gazetës Shneta nëse është bërë ky vlerësim dhe nëse po planifikon që të rifillojë punimet në këtë objekt.
Gazeta Shneta ka kërkuar përgjigje nga MSH nëse po planifikon që të rifillojë punimet në këtë objekt dhe nëse është kryer ndonjë vlerësim, por nuk kemi marr përgjigje. /Gazeta Shneta/
