Zyra Kombëtare e Auditimit ka gjetur parregullsi në Ministrinë e Shëndetësisë (MSH), lidhur me menaxhimin e specializantëve.
Në një raport të auditimit për vitin 2022, bëhet e ditur se janë evidentuar tri raste ku janë shkelur rregullat e parapara sipas ligjit, shkruan Gazeta Shneta.
Sipas raportit një shkelje ka ndodhur kur tri specializante kanë shkuar në pushim të lehonisë pa vendim nga MSH-ja dhe si rrjedhojë nuk kanë mundur të përfitojnë të drejtën e pushimit me pagesë edhe për tre muaj tjerë nga Qeveria.
Tri raste të specializanteve të rregullta kishin shkuar në pushim të lehonisë pa vendim nga MSH-ja. Në mungesë të vendimit të pushimit të lehonisë, specializantet nuk kanë mundur t’i dorëzojnë dokumentet për të përfituar të drejtën e pushimit me pagesë edhe për tre (3) muajt tjerë nga Qeveria,- shkruhet në raport.
Kjo ministri kishte paguar një specializante tre muaj më shumë se 70% të pagës bazë, duke mos i aplikuar ndalesën e pushimit të lehonisë.
Një specializante ishte paguar nëntë muaj nga MSH-ja (tre muaj më shumë) me 70% të pagës bazë, duke mos i aplikuar ndalesën e pushimit të lehonisë, ndalesën e shujtës dhe shtesës për Covid 19. Po ashtu, edhe në dy raste tjera shujta dhe shtesa për Covid 19 nuk i ishte ndalur specializanteve që ishin në pushim të lehonisë, – thuhet në raport.
Ministria e Shëndetësisë me datë 09.03.2022 kishte nxjerrë vendim për pagesën e dy kujdestarive obligative në muaj për specializantët dhe që pagesa duhet të aplikohet në mënyrë retroaktive nga muaji janar 2022.
“Ne kemi vërejtur që në katër raste janë paguar më shumë se dy kujdestari për disa muaj. Në listat e pranuara nga SHSKUK kishte pagesa deri në katër kujdestari. Vlera e gabimit ishte 5,855€. Menaxhimi i dobët ishte rezultat i mungesës së kontrolleve për specializantët nga ana e zyrtarëve përgjegjës të Ministrisë”, shkruhet në raport.
Sipas Zyrës Kombëtare të Auditimit si pasojë e këtyre parregullësive dëmtohet buxheti i Ministrisë.
Mos nxjerrja e vendimeve të pushimeve të lehonisë, pamundëson kompensimin e specializanteve për tre muaj nga qeveria. Në anën tjetër kompensimi jo i duhur i pushimit të lehonisë, kujdestarive si dhe dhënia e shtesave gjatë pushimit të lehonisë ndikon në dëmtimin e buxhetit të Ministrisë,- bëhet e ditur në raport. /Gazeta Shneta/
