Ministri i Shëndetësisë Arben Vitia ka vizituar sot Inspektoratin Shëndetësor dhe Inspektoratin Farmaceutik, dy këto institucione vartëse të MSh-së.
Vitia me këtë rast ka njoftuar inspektorët se është marr vendim që t’iu ndahen nga 250 Euro shtesë në paga për të gjithë inspektorët, por i ka paralajmëruar se nuk do të ketë tolerancë në rastet kur shkelet ligji dhe nuk merren masa për të gjithë njësoj, shkruan Gazeta Shneta.
“Me rritjen e numrit të inspektorëve dhe të shtesave në pagë, si dhe me plotësimin e kushteve të punës, presim angazhim maksimal në zbatimin e ligjit për të gjithë njëjtë”, ka deklaruar Vitia.
Komunikata e plotë nga MSh:
250 euro shtesa për inspektorët, shtohen 33 pozita të reja, Ministri Vitia: Zero tolerancë në rastet kur ka shkelje dhe drejtësi selektive
Sot, Ministri i Shëndetësisë Dr. Arben Vitia vizitoi stafin e Inspektoratit Shëndetësor dhe Inspektoratin Farmaceutik.
Gjatë këtij takimi, Ministri Vitia i njoftoi të pranishmit se kërkesat të cilat janë parashtruar nga ky institucion me qëllim të rritjes së performancës, tashmë janë realizuar.
“Duke e pasur parasysh rëndësinë vitale të punës së Inspektoratit, me prioritet kam trajtuar të gjitha kërkesat të cilat do të ndikojnë në performancën e këtij institucioni për mbrojtjen e shëndetit publik. Nga muaji shtator, të gjithë inspektorët do të marrin shtesa prej 250 eurove. Këto shtesa do të jenë në vazhdimësi. Po ashtu, në fazën finale është procesi i rekrutimit të tridhjetë e tre (33) inspektorëve, prej të cilëve 25 në Inspektoratin Shëndetësor, ndërsa tetë (8) në Inspektoratin Farmaceutik. Planifikimet janë që të krijohen 42 pozita të reja, të cilat do të rrisin dinamikën e punës dhe cilësinë e performancës”, tha Ministri Vitia gjatë këtij takimi.
Ministri kërkoi angazhim të shtuar, ndërsa tha se nuk do të ketë tolerancë në rastet kur ekziston dyshimi për drejtësi selektive.
“Me rritjen e numrit të inspektorëve dhe të shtesave në pagë, si dhe me plotësimin e kushteve të punës, presim angazhim maksimal në zbatimin e ligjit për të gjithë njëjtë”, tha ministri Vitia.
Në këtë takim, U.D e udhëheqëses së Inspektoratit Shëndetësor, znj. Nora Kursani – Demjaha dhe udhëheqësja e Inspektoratit Farmaceutik, znj. Remzije Thaçi, raportuan për inspektimet e realizuara.
Ministri u njoftua se gjatë këtij viti janë realizuar 635 inspektime, prej të cilave 115 gjatë muajit të kaluar nga Inspektorati Farmaceutik.