Është pezulluar tenderi për pastrimin e hapësirave të QKUK-së pasi i njëjti ka përfunduar në OSHP.
Zyra e Prokurimit të QKUK-së ka njoftuar se tenderi për pastrimin e hapësirave të këtij institucioni është pezulluar për shkak të ankesave, shkruan Gazeta Shneta.
“Vendim mbi pezullimin e Aktivitetit të Prokurimit për ‘Pastrimin e Hapsirave të brendshme, të objekteve të QKUK-së’ deri në një vendim të OSHP”, thuhet në vendimin e Nexhat Halilit, shef i Prokurimit në QKUK.
Qendra Klinike Universitare e Kosovës e ka shpallur sot tenderin për pastrimin e hapësirave me vlerë të parashikuar 7 milionë e 130 mijë Euro.
Kjo shumë është rreth 50 për qind më e lartë sesa në tenderin e vitit 2020 i cili ishte mbi 4.8 milionë.
Në tenderin e këtij viti janë shtuar vetëm shtatë punëtorë të rinj, ndërsa janë rritur pagat e për 100 euro bruto më shumë sesa në tenderin e kaluar. Në kontratën e vitit 2020 paga e punëtorëve të pastrimit ka qenë 302 euro bruto, ndërsa me kontratën e re do të jetë 402 euro.
Poashtu në tenderin e këtij viti janë shtuar edhe letrat për duar dhe letër për toalet, si dhe shamponi për larjen e duarve si dhe dezinfektatët për duar. /Gazeta Shneta/