Sipas të dhënave të fundit nga IKSHPK dhe institucionet shëndetësore, intensiteti i gripit sezonal për javën e parë të vitit 2024 ka shënuar një aktivitet më të lartë të qarkullimit, duke kaluar pragun epidemik dhe duke treguar një rritje krahasuar me javën paraprake. Ministria e Shëndetësisë apelon për vigjilencë të shtuar nga qytetarët!
Në rast simptomash të gripit, autoritetet shëndetësore rekomandojnë që të konsultoheni menjëherë me mjekun familjar për këshilla dhe trajtim të duhur.
Masat e rëndësishme për parandalimin e përhapjes së gripit:
- Mbuloni hundën dhe gojën kur të teshtini dhe kolliteni.
- Praktikoni higjienën e duarve dhe shmangni kontaktet e afërta me të sëmurët.
- Nëse jeni të sëmurë, qëndroni në shtëpi për të parandaluar përhapjen e mëtejshme.
- Ushqimi i shëndetshëm me më shumë lëngje, sidomos vitaminoz, dhe gjumi i mjaftueshëm janë thelbësore.
Grupet më të rrezikuara, përfshirë personelin shëndetësor, gratë shtatëzëna, fëmijët, të moshuarit dhe personat me imunitet të dobësuar, duhet të kenë kujdes më të shtuar gjatë sezonit të gripit.
Ministria e Shëndetësisë ka siguruar 85,000 doza të vaksinës sezonale qysh në fillim të tetorit 2023. Vaksinimi mbetet mënyra më e mirë dhe efikase për mbrojtjen kundër gripit. Qytetarët inkurajohen të vaksinohen një herë për të qenë të mbrojtur gjatë tërë sezonit kur gripi është më i shprehur.