Studiuesit po raportojnë se skanimet e rezonancës magnetike (MRI) mund të zbulojnë sëmundjet e zemrës më herët dhe me më shumë saktësi tek gratë sesa llojet e tjera të mjeteve diagnostikuese.
Ata theksojnë se ekokardiografia, e cila aktualisht përdoret për të diagnostikuar sëmundjet e zemrës, nuk është gjithmonë e saktë, raporton Medical News Today përcjell Gazeta Shneta.
Mes tjerash, studiuesit shtojnë se gratë mund të përjetojnë sëmundje të zemrës ndryshe nga burrat.
Skanimet MRI mund të zbulojnë me saktësi dështimin e zemrës tek gratë, sipas studiuesve në Universitetet e Anglisë Lindore, Sheffield dhe Leeds.
Në një studim të ri të botuar në revistën “European Heart Journal Open”, studiuesit analizuan të dhënat e 835 pjesëmarrësve, 60% e të cilëve ishin femra, nga regjistri “ASPIRE” të cilët morën një vlerësim invaziv si dhe një MRI të zemrës në të njëjtën ditë.
Studiuesit raportuan se skanimet joinvazive MRI dhanë imazhe më të sakta sesa përdorimi i një kateteri për të matur presionin e zemrës.
Shkencëtarët vunë re gjithashtu se shumë nga njerëzit me matje të pasakta nga një ekokardiogramë kishin matje të sakta nga skanimi MRI. Ata thanë se besojnë se gjetjet mbështesin përdorimin e një skanimi MRI si një test joinvaziv për sëmundjet e zemrës.
“Nëse, në fakt, studiuesit kanë gjetur një mënyrë për të matur presionin në zemër, ajo do të ishte shumë e avancuar dhe e mirëpritur,” tha Dr. Richard Wright, një kardiolog në Qendrën Shëndetësore të Providences Saint John në Kaliforni, i cili nuk ishte i përfshirë në hulumtimin.
“Për momentin, ne nuk kemi një mënyrë të mirë për ta bërë këtë pa një kateter,” tha Dr. Wright për Medical News Today. /Gazeta Shneta/