Deri në 88 ditë është vonuar dorëzimi i parave të inkasuara nga bashkë pagesat ne spitalet e përgjithshme të Shërbimit Spitalor Klinik dhe Universitar, ka gjetur raporti i Auditorit të Brendshëm.
Njësia e Auditimit të Brendshëm në Shërbimin Spitalor Klinik dhe Universitar ka prezantuar një raport të auditimit të të hyrave në njësitë përbërëse të këtij institucioni, në mbledhjen e Bordit Drejtues të mbajtur të mërkurën, shkruan Gazeta Shneta.
Në këtë raport janë analizuar grumbullimi, regjistrimi dhe barazimi i të hyrave nga parkingjet, bashkëpagesat për certifikata, shitja e shërbimeve, qiratë, të hyrat nga asgjësimi i mbeturinave medicinale si dhe donacionet.
Auditori ka evidentuar disa parregullësi në procesimin e pagesave dhe dorëzimin e tyre. Paratë e inkasuara është gjetur se dorëzohen me vonesë deri në 88 ditë sikurse ka ndodhur në Spitalin e Gjakovës.
“Në SP të Gjakovës nga 10 blloka të testuar në 320 fletëdëftesa mungon numri personal i pacientit. Vonesat janë nga 3 deri në 88 ditë”, thuhet në raport.
Numri personal i pacientëve në fletëdëftesa mungon edhe në spitalet tjera, ndërsa vonesat e dorëzimit të parave janë sikurse në vijim: në Spitalin e Pejës dorëzimi i mjeteve është vonuar nga 1 deri në 71 ditë; në Spitalin e Gjilanit nga 1 deri në 24 ditë; në Spitalin e Ferizajt nga 6 deri në 22 ditë”, thuhet në raportin e auditorit.
Auditori poashtu ka evidentuar se në Spitalin e Gjilanit dhe Gjakovës nuk ka vendime dhe analiza për vendosjen e çmimit për parking.
Poashtu çmimet për asgjësimin e mbeturinave medicinale ndryshojnë nga një spital në tjetrin, teksa mungon dokumentacioni për pranim-dorëzimin e mbeturinave. E gjetura më problematike në këtë rast është në Spitalin e Ferizajt ku nuk dihet sasia e mbeturinave të asgjësuara. /Gazeta Shneta/