Është mbyllur Reparti i Infektivës në Spitalin Rajonal “Dr. Sami Haxhibeqiri” në Mitrovicë.
Drejtori mjekësor i Spitalit të Mitrovicës, Gëzim Berisha, për kallxo.com tha se pas analizave dhe rekomandimeve, ky Repart do të ofrojë vetëm shërbime ambulatore.
“Pas analizave që i kemi bërë, puna në Repartin e Infektivës sinqerisht ka qenë e ulët, për një vit janë hospitalizuar diku mesatarisht 100 pacientë, e që po i bie se vetëm tetë pacientë në muaj kanë marrë shërbime mjekësore” – tha Berisha.
Tutje ai shtoi se në atë Repart punojnë gjashtë infermierët dhe një mjek specializant. Drejtori mjekësor, Gëzim Berisha, tha se këtë kërkesë e kanë dërguar te bordi i Shërbimeve Spitalore Klinike e Universitare të Kosovës (SHSKUK) para disa muajve.
“Kërkesën ne si drejtori e kemi bërë që 2 apo 3 muaj, është kërkuar që këtë kërkesë ta dërgojmë përmes një e-maili, e pastaj na kanë thënë me dërgu edhe fizikisht”- ka thënë ai.
Megjithatë, Berisha tha se janë mbyllur vetëm shërbimet spitalore, ndërsa pacientët mund të hospitalizohen edhe në Repartin e Internos dhe Pulmologjisë, sepse ka hapësirë të mjaftueshme spitali.
Ndërsa për mungesën e stafit të mesëm, infermierëve, në disa reparte, Berisha tha se janë dërguar infermierët nga reparti i Infektivës.
“Gjashtë infermieret e Repartit të Infektivës kanë kaluar në Repartin e Ortopedisë dhe Kirurgjisë”- vazhdoi Berisha.
Berisha tha se për mbylljen e këtij Reparti kanë qenë të informuar të gjitha palët, ndonëse ka pasur persona kundër mbylljes.
Sipas tij, mbyllja e Repartit nuk është rasti i vetëm në Kosovë e as në botë.
“ Më së pari ky rast nuk është i vetmi në Kosovë, i njëjti rast është edhe në Ferizaj, ku punon vetëm një infektolog në kuadër të Repartit të Internos, në Evropë kurrkund nuk ka Repart të Infektivës, ka Repart të Internos dhe Neurologjisë, ku pacientët drejtohen në këto reparte, për trajtime mjekësore”- shtoi Berisha.
Doktoresha infektologe, Luljeta Buçinca-Zhubi, për kallxo.com tha se si Repart kanë marrë urdhër nga drejtori mjekësor për mbylljen e Infektivës në Spitalin Rajonal të Mitrovicës.
“Unë s’kam shumë me thanë, e kam urdhrin nga drejtori mjekësor që me u mbyllë Reparti e me kalu në shërbime ambulatore, edhe ashtu paskan vendosë”- ka thënë Buçinca-Zhubi.