Gazetarja e Gazetës Shneta Diana Basholli, është shpërblyer me vendin e parë për Raportimin e Përgjegjshëm Rreth Diabetit nga Asociacioni i Gazetarëve të Kosovës në bashkëpunim me IHS dhe AQH.
Diana Basholli, gazetare në Gazetën Shneta, ka fituar Vendin e Parë për Raportimin e Përgjegjshëm Rreth Diabetit. Çmimi është ndarë nga Asociacioni i Gazetarëve të Kosovës në partneritet me organizatat IHS Project dhe AQH Project.
Hulumtimi i Bashollit për sëmundjen e Diabetit të Tipit 1 me titull “Kam mendu që diabeti i prek veç pleqtë”, ka sjellë në dritë vështirësitë e fëmijëve dhe të rinjve në përballjen me këtë sëmundje. Fokusi i temës ka qenë edhe në mungesën e pajisjeve teknologjike, siç janë pompa insulinike dhe sensorët për matjen e glikemisë, të cilat do ta lehtësonin jetën e të rinjve me diabet.
Hulumtimi gjithashtu vë në pah vështirësitë e familjeve të fëmijëve me diabet në sfidat gjatë përballjes me sëmundjen, dhe mungesën e përkrahjes institucionale. Hulumtimin mund ta lexoni në duke Klikuar KËTU.
Çmimi i dytë shkoi për Vlera Shabani nga Kallxo, për hulumtimin “Kemi shumë shpenzime”: Prindërit e fëmijëve me diabet presin dorën e shtetit.
Çmimi i tretë iu dha gazetares Arbreshë Uka nga Klan Kosova, me artikullin “Jeta e sfiduar e 25-vjeçarit me diabet: Më prish punë edhe në dashuri”.
Teksa, juria vlerësuese e përbërë nga Arton Konushevci, Sokol Shameti, dhe Venera Berisha Muharremi, vendosi të ndante edhe çmimin e katërt, i cili shkoi për emisionin e Kanal10, Familja Jonë, me autore Saranda Bujupi Rama.
Këto çmime u ndanë pas ngritjes së kapaciteteve të gazetarëve në prill të këtij viti përmes një trajnimi dy-ditor të mbështetur nga Agjencia Zvicerane për Zhvillim dhe Bashkëpunim me synim vlerësimin e punës së gazetarëve që kanë kontribuar në rritjen e ndërgjegjësimit për këtë çështje të rëndësishme shëndetësore.
Përmes kësaj iniciative, u promovua raportimi cilësor dhe etik mbi diabetin, duke theksuar rëndësinë e informimit të drejtë për parandalimin, diagnostikimin dhe trajtimin e kësaj sëmundjeje.
Të pranishëm në ceremoninë e ndarjes së çmimeve ishin përfaqësues të mediave, profesionistë shëndetësorë, dhe përfaqësues nga organizatat partnere.
AGK falënderon të gjithë gazetarët pjesëmarrës dhe i inkurajojnë ata të vazhdojnë të trajtojnë tema të rëndësishme shëndetësore me përgjegjësi dhe profesionalizëm.