Në Shqipëri janë mbi 1700 raste me HIV. Raporti i OBSH për mbikëqyrjen e HIV/AIDS në Evropë thekson se nga viti në vit rastet në Shqipëri kanë ardhur në rritje.
Vetëm vitin që shkoi në vendin tonë u zbuluan 123 persona të infektuar.
Në total nga 1725 raste, 73 % janë meshkuj të infektuar. E thënë ndryshe, në Shqipëri me HIV janë 1257 meshkuj dhe 468 femra.
Ajo që bie në sy në të dhënat e OBSH për Shqipërinë, është fakti se 21% e të infektuarve meshkuj e kanë marrë virusin nga kontakti seksual me meshkuj të tjerë, si dhe në 9 raste nga injektimi i drogave me shiringë. Megjithatë në shumicën e rasteve infektimi ka ardhur nga marrëdhënit heteroseksuale.
Në raport me Europën, Shqipëri ka një prevalencë të ulët të raportimeve me HIV. Kështu Shqipëria renditet në vendin e 44 nga 53 shtete në studim.
Vendi ynë lë pas Serbinë, Malin e Zi dhe Maqedoninë e Veriut si shtetet me numrin më të ulët të rasteve me HIV/AIDS.
Ajo që është shqetësuese ne raport për vendin tonë, është diagnostikimi i vonë i sëmundjes duke u renditur në 9 vendet me përqindjen më të lartë për diagnozat e vona.