Ministria e Shëndetësisë ka sqaruar rreth shqetësimeve të ngritura nga distributorët për çmimet e barnave. Nga kjo ministri kanë thënë se në bazë të Ligjit për çmimet e produkteve medicinale, çmimi i barnave nuk mund të kalojë 7.5% të çmimit të importit CIP.
Ministria e Shëndetësisë ka sqaruar për Gazetën Shneta shqetësimet e ngritura nga Shoqata e Distributorëve Farmaceutik në lidhje me vendosjen e çmimit të barnave.
Nga MSh kanë deklaruar se Neni 9, paragrafi 10 i Ligjit për çmimet e produkteve medicinale, do të respektohet në tërësi nga Komisioni.
“Ligji Nr. 04/L-120, në Nenin 9, paragrafi 10, përcakton qartë se çmimi i produkteve medicinale me shumicë përfshin marzhin e qarkullimit me shumicë dhe shpenzimet e tjera vartëse, por ky marzh nuk mund të kalojë 7.5% të çmimit të importit CIP. Çmimi CIP përfshin çmimin e blerjes së produktit, si dhe shpenzimet e transportit dhe sigurimit deri në destinacionin përfundimtar. Komisioni për Përcaktimin e Çmimit ka obligim të zbatojë këto dispozita ligjore dhe të sigurojë që marzhi dhe shpenzimet e tjera vartëse të përfshihen brenda këtij kufiri prej 7.5% të çmimit të importit CIP”, thuhet në përgjigjen nga MSh.
Ditë më parë Gazeta ka publikuar një artikull ku Shoqata e Distributorëve ka ngritur shqetësimin se Komisioni i MSh-së për vendosjen e çmimeve nuk e ka respektuar në tërësi Nenin 9, paragrafin 10 i cili thotë:
“Pjesë përbërëse e çmimit me shumicë është vlera e marzhës të qarkullimit me shumicë dhe shpenzimeve të tjera vartëse jo më shumë se 7.5% që llogaritet duke i shtuar çmimit të importit CIP, marzhin e qarkullimit me shumicë dhe shpenzimet e ndërlidhura, por jo më shumë se sa vlera e kalkuluar sipas paragrafëve 5, 6, 7 apo 8 të këtij neni”.
“Gjatë vendosjes së çmimeve nuk është zbatuar ky nen në tërësi për faktin se nuk janë përfshirë shpenzimet e ndërlidhura të cilat janë 1% pagesa e lejes së importit në Agjencinë e Kosovës për Produkte dhe Pajisje Medicinale, pastaj rreth 0.5% pagesat e banderolave për kutia të barnave, Licencimi I depose për qarkullues farmaceutik 1200 Euro/vit, regjistrimi I produkteve farmaceutike prej 1000-2000 Euro në 5 vite, shpenzimet e mirëmbajtjes së autorizim marketingut prej 5-10%. Të bashkangjitur keni çmimoren e shërbime për operim të bizneseve farmaceutike sipas legjislacionit përkatës. Në këto shpenzime nuk përfshihen shpenzimet e tjera operative si pagat e punëtorëve, qiratë, karburantet, automjetet, transporti etj”, kanë deklaruar nga Shoqata. /Gazeta Shneta/