Një rast i ri i variantit Clade Ib të mpox është zbuluar në Angli, sipas Agjencisë së Sigurisë Shëndetësore të Mbretërisë së Bashkuar.
Rasti është identifikuar në East Sussex dhe personi aktualisht po merr kujdes të specializuar në spitalin Guy’s and St Thomas’ NHS Foundation Trust.Pacienti ishte kthyer së fundmi nga Uganda, ku aktualisht ka transmetim komunitar të variantit Clade Ib të mpox, i njohur gjithashtu si lisë majmuni shkruan Skynews përcjell Gazeta Shneta.
Varianti Clade Ib është një formë e re e virusit, e cila u shpall emergjencë globale shëndetësore nga Organizata Botërore e Shëndetësisë (OBSH) në gusht. Mpox, përfshirë edhe variantin Clade Ib, zakonisht përhapet përmes kontaktit të ngushtë fizik, kontaktit me kafshë të infektuara ose transmetimit seksual.
Simptomat e zakonshme të mpox përfshijnë një skuqje të lëkurës ose lezione të mbushura me qelb, të cilat mund të zgjasin nga dy deri në katër javë. Sëmundja gjithashtu mund të shkaktojë ethe, dhimbje koke, dhimbje muskujsh, dhimbje shpine, lodhje dhe zmadhim të nyjeve limfatike.
Megjithatë, OBSH ka paralajmëruar se në disa persona sëmundja mund të jetë e rëndë, të çojë në komplikime ose edhe në vdekje. Të sapolindurit, fëmijët, gratë shtatzëna dhe personat me dobësi imunitare, si ata me HIV të avancuar, mund të jenë në rrezik më të lartë për forma më të rënda të sëmundjes dhe vdekje.
Varianti Clade Ib i mpox u zbulua vitin e kaluar dhe u gjurmua deri në një qytet minerar në Republikën Demokratike të Kongos (DRC).
Nga janari 2022 deri në nëntor 2024, 263 vdekje të konfirmuara nga laboratori të shkaktuara nga mpox u regjistruan nga OBSH në 82 shtete, të cilat së bashku kanë pasur më shumë se 117,000 raste.
Pothuajse 17,500 raste janë identifikuar në 25 shtete afrikanë, kryesisht në Republikën Demokratike të Kongos (DRC), ku janë regjistruar 9,513 raste që nga fillimi i vitit të kaluar dhe 87 vdekje.