Zëdhënësja e Shtëpisë së Bardhë, Karoline Leavitt ka bërë të ditur se dëbimet e emigrantëve kanë filluar.
Përmes një postimi në X, ajo tha se presidenti i ShBA-ve, Donald Trump po dërgon një mesazh të fortë dhe të qartë për të gjithë botën se nëse hyni ilegalisht në Shtetet e Bashkuara të Amerikës, do të përballeni me pasoja të rënda.
“Presidenti Trump po dërgon një mesazh të fortë dhe të qartë për të gjithë botën: nëse hyni ilegalisht në Shtetet e Bashkuara të Amerikës, do të përballeni me pasoja të rënda”, shkroi ajo.
Informacioni i marrë nga Fox News Digital tregon se në 33 orët ndërmjet mesnatës së 21 janarit dhe 9 të mëngjesit të 22 janarit, Operacionet e Zbatimit dhe Largimit të ICE arrestuan më shumë se 460 emigrantë të paligjshëm me histori kriminale të sulmeve seksuale, grabitjeve, vjedhjeve, sulmeve të rënda, drogës dhe shkeljet e armëve, rezistenca ndaj arrestimit dhe dhuna në familje, shkruan NYPost, transmeton Gazeta Shneta.
Agjentët arrestuan shtetas nga një mori vendesh, duke përfshirë Afganistanin, Angolën, Bolivinë, Brazilin, Kolumbinë, Republikën Dominikane, Ekuadorin, El Salvadorin, Guatemalën, Hondurasin, Meksikën, Nikaraguën, Senegalin dhe Venezuelën.
Operacioni për dëbimin masiv nisi vetëm pak ditë pasi presidenti Trump firmosi një urdhër ekzekutiv për shpalljen e gjendjes së emergjencës në kufirin me Meksikën dhe kërkoi plane konkrete për të luftuar ata që i quajti “emigrantë kriminelë”.
Gjithashtu ka urdhëruar dërgimin e deri në 10 mijë trupave ushtarake për të mbrojtur kufirin jugor nga ajo që e konsideron “një pushtim nga refugjatët”./Gazeta Shneta/