Action for Mothers and Children (AMC), në partneritet me Americares, ka realizuar një tjetër donacion jetik për Klinikën Neonatologjike në Kosovë, duke dhuruar 100 shishe Survanta në vlerë prej rreth 40 mijë euro.
Ky donacion është një ndihmë thelbësore për foshnjat e lindura parakohe, të cilat kanë nevojë për mbështetje intensive për të mbijetuar dhe për t’u zhvilluar shëndetshëm.
Survanta është një terapi e domosdoshme për trajtimin e Sindromës së Distresit Respirator (RDS), një gjendje e rëndë që prek foshnjat e lindura para kohe si pasojë e mungesës së surfaktantit në mushkëri.
Ky medikament ndihmon në hapjen dhe funksionimin e mushkërive, duke reduktuar ndjeshëm rrezikun e komplikimeve të rënda respiratore dhe duke rritur shanset për një zhvillim normal të foshnjave.
Falë këtij donacioni, Klinikës Neonatologjike i mundësohet të sigurojë trajtim më efektiv për dhjetëra foshnja që lindin para kohe çdo vit. AMC dhe Americares vazhdojnë të jenë të përkushtuara për të mbështetur shëndetin e nënave dhe foshnjave në Kosovë, duke siguruar barna dhe pajisje esenciale për përmirësimin e kujdesit shëndetësor.
AMC shpreh mirënjohjen e saj të thellë për Americares dhe për të gjithë partnerët dhe donatorët që ndihmojnë misionin tonëduke siguruar një fillim më të sigurt dhe më të shëndetshëm për foshnjat!
Aksioni për Nëna dhe Fëmijë angazhohet për shëndet më të mirë të nënave dhe fëmijëve në Kosovë. Misioni i AMC-së është shpëtimi i jetëve dhë përmirësimi i shëndetit të foshnjëve, nënave dhe fëmijëve në Republikën e Kosovës. Për ta arritur misionin e saj, AMC zbaton projekte dhe programe të ndryshme të cilat kanë ndikim të madh dhe të qëndrueshëm në sistemin shëndetësor dhe ofrojnë zgjidhje afatgjata.
