Drejtori i programeve në Shoqatën për të Drejtat e Pacientëve në Kosovë (PRAK), Besim Kodra, ka thënë se në Kosovë pacientët përballen me një sërë sfidash në sistemin shëndetësor, duke filluar nga mungesa e barnave e deri te trajtimi joetik nga stafi mjekësor.
Sipas tij, mungesa e mekanizmave funksionalë për adresimin e ankesave po bën që shumë prej tyre të heqin dorë nga kërkimi i së drejtës që kanë. Ai ngrit shqetësimin se kjo situatë po krijon një kulturë të heshtjes në mesin e pacientëve.
Ai shtoi se shpeshherë pacientët detyrohen të përballen vetë me situatën, pa pasur një adresë të sigurt për t’i kanalizuar shqetësimet e tyre.
“Ankesat janë të natyrave të ndryshme: për mungesë të barnave, për trajtim joetik e johuman. Ka ankesa për listat e pritjes, për komunikime mes stafit shëndetësor dhe pacientëve, për kushtet hotelierike, higjienike e të tjera. Problematike për ne mbetet fakti që institucionet nuk kanë mekanizma të qartë të trajtimit të ankesave dhe kjo i demotivon njerëzit për t’u ankuar edhe shpesh herë ata i shtrëngojnë vetë duart dhe konfrontohen vetë me stafin shëndetësor, që është diçka që nuk duhet të ndodhë. Mendoj që Ministria e Shëndetësisë është dashur të krijojë një procedurë standarde të menaxhimit të ankesave dhe çdo ankesë të marrë një trajtim ose një epilog të drejtë”, ka thënë Kodra për Ekonomiaonline.
Kodra vlerëson se gjendja aktuale nuk është pasojë e mungesës së problemeve, por e mungesës së informimit dhe e besimit të qytetarëve në sistemin që supozohet se duhet t’i mbrojë.