Në mbarë botën mungojnë rreth 5.8 milionë infermierë – dhe kjo mungesë po përkeqësohet nga kërkesa në rritje për profesionistë të huaj në kujdesin shëndetësor në Evropë.
Vendet e pasura evropiane, që varen nga infermierët e lindur jashtë vendit, po e përkeqësojnë mungesën globale të infermierëve, sipas një raporti të ri.
Forca punëtore e infermierëve në botë arriti në 29.8 milionë në vitin 2023, nga 27.9 milionë pesë vjet më parë. Por hendeku vazhdon të ekzistojë dhe ka dallime të mëdha mes vendeve të pasura dhe atyre të varfra, thuhet në raportin e përpiluar nga Organizata Botërore e Shëndetësisë (OBSH) dhe organizata të tjera, raporton Euronews Health përcjell Gazeta Shneta.
“Nuk mund t’i injorojmë pabarazitë që karakterizojnë peizazhin global të infermierisë,” tha drejtori i OBSH-së, Dr. Tedros Adhanom Ghebreyesus.
Rajoni evropian, që përfshin edhe Azinë Qendrore, ka 7.2 milionë infermierë dhe pret të shtojë edhe 1 milion të tjerë deri në vitin 2030.
Në këtë rajon ka 76.9 infermierë për çdo 10.000 banorë – një shkallë pesëfish më e lartë se në Afrikë dhe Mesdheun Lindor.
Por infermierët evropianë – të cilët përbëjnë rreth tre të pestat e punonjësve shëndetësorë – po përballen me sfida që mund të ndikojnë në shëndetin e përgjithshëm në kontinent.
Një forcë punëtore në plakje
Në rreth 20 vende të botës – kryesisht në Evropën e pasur – numri i infermierëve të rinj që hyjnë në profesion nuk e përmbush kërkesën për shërbimet e tyre. Kjo vjen si pasojë e daljes në pension dhe mungesës së zëvendësimeve, si dhe rritjes së moshës së popullsisë me nevoja më të ndërlikuara shëndetësore.
Në vitin 2023, për shembull, 31% e infermierëve në Evropë ishin nën moshën 35 vjeç, ndërsa 21% ishin mbi 55 vjeç. Në Evropën Lindore, përqindja e infermierëve të moshuar është edhe më e lartë.
Trajnimi i brezit të ri
Pavarësisht sfidave, Evropa ka një sistem më të qëndrueshëm për përgatitjen e infermierëve të rinj krahasuar me shumicën e rajoneve në botë. Në vitin 2023, për çdo 100.000 banorë u diplomuan 42.7 infermierë të rinj në Evropë, kundrejt mesatares globale prej 25.3.
Shumë nga infermierët e rinj në rajon vijnë nga Azia Qendrore, ndërsa Evropa Perëndimore përgatit më pak.
Paga mesatare për infermierët e rinj në Evropë ishte 2.508 dollarë (2.205 euro) në muaj. Edhe kur merret parasysh fuqia blerëse, infermierët evropianë kishin pagën më të lartë fillestare në botë.
Megjithatë, vendet e pasura evropiane duhet të marrin masa për të rritur regjistrimet në programet e trajnimit dhe për të inkurajuar infermierët që të qëndrojnë në profesion. /Gazeta Shneta/