“Agoni nuk është vetëm një emër, është simbol i një padrejtësie që nuk guxon të harrohet,” u shpreh Albani, vëllai i Agon Zejnullahut, gjatë një proteste të mbajtur sot para stacionit policor në Lipjan.
Vëllai i tij tha se familja kërkon hetim të plotë dhe se nuk do të ndalet në kërkimin për drejtësi.Ai theksoi se Agoni është simbol i një padrejtësie që nuk duhet të harrohet dhe kërkoi që institucionet të reagojnë me përgjegjësi.
“Me zemër plot dhimbje por me qëllim të pastër e paqësor, ju falënderoj për praninë tuaj. Sot nuk jemi mbledhur për urrejtje, sot jemi këtu për të kërkuar drejtësi, sot jemi këtu për Agonin, një djalë, një jetë, një zë që nuk mund të heshtet. Jemi këtu sepse drejtësia nuk është privilegj, por e drejtë. Jemi këtu sepse dhimbja e familjes së Agonit është dhimbje kolektive, sepse heshtja vret për herë të dytë. Agoni nuk është vetëm një emër, është simboli i një padrejtësie që nuk guxon të harrohet. Ai është kujtimi që na bënë thirrje të mos mbyllim sytë, të mos dorëzohemi që të kërkojmë të vërtetën”, u shpreh Albani.