Organizata Botërore e Shëndetësisë (OBSh) paralajmëroi të martën se bota mund të përballet me një përsëritje të epidemisë së chikungunyas së vitit 2005, nëse nuk merren masa urgjente për të frenuar përhapjen e virusit.
Gjatë një takimi informues në OKB, Diana Rojas Alvarez, udhëheqëse e ekipit të OBSh-së për arboviruset, tha se “Chikungunya” nuk është një sëmundje e njohur gjerësisht, por ajo tashmë qarkullon në 119 vende, duke vënë në rrezik 5.6 miliardë njerëz, raporton AA.
Virusi i përhapur nga mushkonjat shkakton ethe, skuqje dhe dhimbje të forta të kyçeve që mund të zgjasin me javë ose të çojnë në paaftësi afatgjata deri në 40% të pacientëve.
Që nga fillimi i vitit 2025, shpërthime të mëdha ka pasur në ishujt e Oqeanit Indian, duke përfshirë La Reunion, Mayotte dhe Mauritius, ku një e treta e popullsisë së La Reunion vlerësohet të jetë infektuar, tha Rojas.
Sipas saj, virusi tani po përhapet më tej në Madagaskar, Somali dhe Kenia, ndërsa Azia Jugore po sheh shpërthime të vazhdueshme pas epidemisë së Indisë në vitin 2024. Sri Lanka dhe Bangladeshi kanë raportuar një rritje të rasteve, dhe infeksione të importuara janë zbuluar në Evropë, duke përfshirë transmetimin lokal në Francë dhe rastet e dyshuara në Itali.
“Modeli pasqyron atë që pamë në vitet 2004-2005”, paralajmëroi Rojas. “Duhet të veprojmë tani për të shmangur përsëritjen e historisë”.
Ajo theksoi urgjencën që vendet ku mushkonjat Aedes janë të pranishme të forcojnë mbikëqyrjen dhe përpjekjet për kontrollin e mushkonjave. Megjithëse rastet tani po bien me fillimin e dimrit në Oqeanin Indian, ajo theksoi se zbulimi i hershëm dhe reagimi i shpejtë janë çelësi për kufizimin e infeksioneve dhe parandalimin e barrës shëndetësore dhe ekonomike afatgjata.
OBSh po ndihmon vendet duke vendosur ekspertë, duke trajnuar punonjës të shëndetësisë dhe duke mbështetur masat e kontrollit të vektorëve, shtoi ajo.