Italia ka konfirmuar 32 raste të virusit të Nilit Perëndimor dhe dy vdekje gjatë vitit 2025, ndërsa Europa Jugore po përballet me rritje të rasteve gjatë muajve të nxehtë të verës. Shumica e rasteve janë regjistruar në provincën e Latinës, rreth 100 kilometra në jug të Romës.
Ky virus përhapet kryesisht përmes pickimeve të mushkonjave të infektuara, veçanërisht gjatë verës. Raste tek njerëzit janë raportuar gjithashtu edhe në Greqi, raporton Euronews Health transmeton Gazeta Shneta.
Sipas Institutit Kombëtar të Shëndetësisë (ISS), situata epidemiologjike është e ngjashme me vitet e kaluara, megjithatë përhapja gjeografike këtë vit paraqitet më ndryshe.
Rastet janë konfirmuar gjithashtu në Piemonte, Veneto, Emilia-Romagna dhe Campania. Dy vdekjet u regjistruan në Fondi dhe provincën e Novarës.
“Virusi i Nilit Perëndimor është endemik në vendin tonë prej disa vitesh,” tha Anna Teresa Palamara, drejtore e departamentit për sëmundjet infektive në ISS, duke shtuar se janë në fuqi masa për ta parandaluar përhapjen.
Ajo theksoi se 80 për qind e rasteve janë pa simptoma, por rreziku i ndërlikimeve të rënda është më i madh për personat më të brishtë.
Instituti Lazzaro Spallanzani në Romë konfirmoi 12 raste të reja. Virusi i Nilit Perëndimor i përket familjes Flaviviridae dhe u identifikua për herë të parë në vitin 1937 në rajonin e Nilit Perëndimor në Ugandë. Zogjtë e egër dhe mushkonjat, veçanërisht ato të llojit Culex, janë burimet kryesore të përhapjes. Nuk ka rrezik të transmetimit nga njeriu te njeriu. /Gazeta Shneta/