Nga 1 janari i vitit 2026, bonusit të bebeve në Shqipëri do t’i ndryshojë krejtësisht forma.
Në vend të çekut që jepet një herë në lindje, prindërit do të përfitojnë një shumë mujore për çdo fëmijë deri në moshën pesë vjeçare.
Pagesat nisin nga 50 euro muaj, për fëmijën e parë, 70 euro për fëmijen e dytë dhe 100 euro për fëmijën e tretë, pagesa që do të jenë për pesë vjet.
“Të gjithë e dinë sa kushton të rrisësh një fëmijë sot – që nga pelenat, deri te qumështi. Në këto kushte, ato 40 mijë lekë, 80 mijë lekë apo edhe 120 mijë lekë që jepeshin njëherësh, nuk mbulonin thuajse asgjë.Vetëm shpenzimet minimale mujore për një fëmijë sot janë mbi 10 mijë lekë të reja. Ndaj kalimi nga një bonus i njëhershëm në një mbështetje mujore është një hap pozitiv”, tha Klodian Muça.
“E vetmja paqartësi mbetet: a do të nisë zbatimi i skemës më 1 janar 2026, apo do të përfshijë edhe fëmijët e lindur gjatë vitit 2025? Nga ana tjetër, duhet marrë parasysh edhe ndikimi në buxhet”, u shpreh tutje Muça./Euronews.al