Pas disa ditësh kërkimesh, një rast i raportuar si zhdukje e të miturit ka marrë fund me rezultat pozitiv.
Burime të Sinjalit mësojnë se D.G. rreth 14-vjeçar nga fshati Llabjan – Novobërdë, i cili ishte raportuar si person i zhdukur, është gjetur më 1 gusht 2025, rreth orës 13:50, në tregun e qytetit të Gjilanit.
Sipas burimeve të afërta me familjen, i mituri ishte duke punuar në treg dhe pas identifikimit është sjellë në zyrat e Njësisë për Hetime në Gjilan, ku është intervistuar në prani të një përfaqësuesi ligjor nga Qendra për Punë Sociale.
Në deklaratën e tij, ai ka bërë të ditur se gjatë kohës që ishte larguar nga shtëpia nuk ishte keqtrajtuar fizikisht apo seksualisht nga askush. Po ashtu, ka pranuar se një pjesë e të hollave që i kishin marrë nga shtëpia, i kishte shpenzuar për të blerë trotinet, rroba dhe këpucë për vete dhe për vëllain, i cili e kishte shoqëruar natën e parë pas largimit nga familja.
Për rastin është njoftuar Prokuroria, e cila ka udhëzuar që rasti të mbyllet, ndërsa dokumentacioni i plotë i rastit t’i dorëzohet Prokurorisë Themelore në Gjilan në formë të raportit të veçantë.